Xhudistja dhe kampionia olimpike, Majlinda Kelmendi ka folur për garën e fundit të karrierës së saj si xhudiste. Në një intervistë për mediat kosovare, Kelmendi tha karrierën në aspektin sportive e ka mbyllur në mënyrën më të keqe, e që thotë, se nuk e ka merituar të ndodhte kështu.
Kelmendi më tej tha se në vitin e fundit nuk është ndjerë mirë dhe për shkak të lëndimeve ka qenë e lodhur fizikisht dhe mendërisht, gjë që kanë ndikuar në paraqitjen e saj në lojërat olimpike në Tokio.
“Ka kohë që e kom menduar. Viti i fundit ka qenë i vështirë për mu. Në janar të këtij viti, i kam thënë Tonit që nuk duan të garoj më, nuk ndihem mirë. Arsyeja kryesore kanë qenë lëndimet. Jam lodh shumë fizikisht dhe mendërisht. Unë e kom ditë që lojërat olimpike në Tokio kanë me qenë gara jem e fundit dhe qashtu ka ndodhë” – tha Kelmendi.
Xhudistja e artë tha se ceremonia e mbrëmshme ku u nderua me urdhrin ‘Shote Galica’ e ka bërë të ndihet jashtëzakonisht mirë.
“Ceremonia e mbrëmshme ka qenë jashtëzakonisht e mirë, presidentja Osmani më ka nderuar shumë. Karrierën në aspektin sportive, unë personalisht mendoj që e kom mbyll në mënyrën më të keqe të mundshme dhe s’e kom meritu me ndodh ashtu. Për të shkuar në lojëra olimpike si një garues me potenciale që të shkoj deri në finale dhe me ra në xhiro të parë, ndihesh shumë keq. Në anën tjetër, çmimi dhe nderimi që ma ka dhënë presidentja më ka bërë të ndihem jashtëzakonisht mirë” – shtoi ajo.
Discussion about this post