Ish-trajneri i kombëtares Astrit Hafizi ka kritikuar vendimin e kreut të pankinës së kuqezinjve, Edi Reja për të lënë jashtë sulmuesin Armando Broja.
“Nuk kishte mundësi për të luajtur, janë disa paqartësi që zgjidhen me çastet apo në sekondat e fundit. Kur gjërat janë të përcaktuara që në fillim dhe secili duhet të ketë idetë e qarta kush është grupi e cilat janë arsyet pse është një lojtar apo jo, pa shtuar sforcimet e minutave të fundit, pa shtuar lojtarë që luajnë me gjilpërë. Shumë gjëra me raste janë të turbullta, edhe për trajnerin.
Bajrami është një lojtar i cili këtij terreni dhe stili të lojës, i përshtatet. Ai i shërben lojës tonë, për mbajtjen e topit, pasimet, do ta shohim se varet nga gjendja fizike që ka një lojtar. Futja në lojë mendoj se është pozitive.
Edhe Strakosha, është gjë pozitive aktivizimi i tij, kemi thënë shpesh që të dy portierët mund të luajnë. Mendoj se mund të futej më parë në ndeshje të tjera, se janë momente që janë në kushte të barabarta, që të mos i shtoj ndonjë plus Strakoshës që ka luajtur në Ligën e Europës.
Nuk janë shumë serioze disa veprime, mori Muçin nga Shpresat te Kombëtarja, pastaj e çoj prap te Shpresat. Nuk duhet të mendohet për 2024, janë shumë gjëra të paqarta. Në 2022 nuk shkoi, tani flet për 2024. Vendin e tretë kemi kohë qe e themi është gjëja më e mirë. Po të mendohet që këto lojtarë të La Liga-s e të Serisë A, nuk luajnë, një nga ta dhe Balliu.
Janë lojëra fëmijësh, jo vjen Balliu pastaj doli me Covid, Broja sa në fushë në tribunë, Muçi sa këtej sa andej, këto janë lojëra. Një trajner shqiptar do të hante goditje po të bënte të tilla lëvizjesh. Flasim drejtë dhe qartë, një lojtar që luan në La Liga duhet të luajë këtu dhe pikë. Nuk them për Manajn, ai ishte shans që u stërvit me Barcelonën e më pas e pamë ku përfundoi”, tha Hafizi.
Discussion about this post