Kryetari i Bashkisë Kuçovë, Kreshnik Hajdari, sfidon organin e akuzës duke shkelur rregullat e prokurimit. Disa herë ai është bërë pjesë e skandaleve dhe është paraqitur në SPAK, madje në janar të këtij viti, kryebashkiaku u dënua me 150 orë pune në komunitet pasi nuk kishte deklaruar dënimin që kishte marrë në shtetin grek disa kohë më parë.
Në fakt këtë tender e ka hapur ‘Qendra Ekonomike e Arsimit Bashkia Kuçovë, që është në varësi të bashkisë. Ky prokurim ka nisur më 26 shkurt 2024 dhe ka si objekt “Blerje Gazoili”, për të cilin do të shpenzohen 27 milionë lekë.
Pikëpyetja e parë e këtij tenderi është afati. Përse Hajdari prokuron naftë për dy vjet?
Ku e di Hajdari se si do të jetë çmimi i naftës vitin tjetër? Përse u pret rrugën kompanive të tjera që mund ta ofrojnë këtë furnizim me kosto më të ulët për buxhetin e bashkisë, që mund të paraqiten vitin e ardhshëm?
Deri më datë 7 mars 2024, kur ka qenë edhe afati i fundit i paraqitjes së ofertave, vetëm firma “Qorri Oil” shpk ka bërë një aplikim me ofertën e saj. Shohim në dokument se oferta e kësaj firme është në vlerën 27 milionë lekë dhe duke marrë parasysh këtë fakt, por edhe mungesën e konkurrencës, tenderi duhej anuluar. Pra, nuk ka kuptim organizimi i tenderit që oferta fituese të jetë e barabartë me fondin limit.
Hajdari jo vetëm që nuk e ka anuluar, po me nxitim në të njëjtën ditë ka firmosur kontratën e prokurimit me firmën “Qorri Oil”, në pronësi të Flamur dhe Besnik Qorrit.
Open Data i ka vendosur ‘Red Flag’ si sinjal që me këtë tender po abuzohet me paratë e qytetarëve. Na çudit fakti që kryetari guxon të bëjë shkelje, kur vetëm dy muaj më parë ka marrë një dënim. Kujtojmë se më datë 25 janar 2024, kryebashkiaku i Kuçovës, Kreshnik Hajdari, është dënuar me 9 muaj burg për fshehjen e një dënimi në Greqi, në vitin 1999. Dënimi, i ulur në 6 muaj prej gjykimit të shkurtuar, iu konvertua në 150 orë punë në komunitet, ndërsa avokati i tij tha se dënimi nuk ndikon në detyrën e tij në krye të bashkisë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post