“Hajdut, dorëhiqu”. Kjo ishte thirrja që mbizotëroi protestën e zhvilluar këtë të enjte para zyrës së kryebashkiakut të Tiranës, Erion Veliaj.
Me mesazhet në pankarta, thirrjet në kor dhe nga megafoni i protestës, qytetarë, anëtarë të shoqërisë civile dhe përfaqësues të opozitës kërkuan dorëheqjen e Erion Veliajt nga detyra e kryetarit të Bashkisë së Tiranës.
Nuk mungoi as apeli drejtuar Prokurorisë së Posaçme për të çuar pas hekurave Veliajn lidhur me aferën e njohur si “5 D” si dhe dosjen për inceneratorin e Tiranës.
Protesta që nisi rreth orës 11:00 dhe zgjati rreth dy orë u shoqërua në disa momente me tensione mes protestuesve dhe policisë. Protestuesit u përplasën me uniformat blu, teksa tentuan të hiqnin barrierën metalike të vendosur para protestës.
Para derës kryesore të bashkisë u hodh molotov. Nuk munguan as tymueset dhe mollët drejt fasadës së zyrës së Veliajt.
Përfaqësues të opozitës, që organizuan tubimin, paralajmëruar se protestat do të vijojnë deri në dorëheqjen e Veliajt nga detyra e kryebashkiakut.
Kjo e sotmja, ishte protesta e dytë e zhvilluar para bashkisë që prej arrestimeve të drejtorëve të Veliajt për dosjen e njohur si “5D”.
Tre prej bashkëpunëtorët e ngushtë të Veliaj janë pas hekurave lidhur me procedimin penal, ndërsa të tjerë janë nën masa më të lehta sigurie. Hetimet e SPAK zbuluan se dy drejtorët e “Lalit”, Mariglen Qato dhe Redi Molla zotëronin “de facto” një kompani përmes së cilës u jepnin tendera vetes si drejtues të Ujësjellësit, si dhe merrnin në mënyrë të paligjshme miliona në procedura prokurimi edhe nga Bashkia e Tiranës dhe institucionet e tjera nën varësi. Shuma e arkëtuar i kalon 20 milionë euro. Kompania në fjalë ka marrë po ashtu disa leje ndërtimi nga institucioni që drejton Erion Veliaj.
Për aferat e vartësve, Veliaj pretendon se nuk kishte dijeni. Ndërkaq, opozita e akuzon si “kreun e bandës së drejtorëve hajdutë”.
Discussion about this post