Grupi “Homeland Justice”, që ka marrë përsipër autorësinë e dy sulmeve kibernetike ndaj faqeve online të institucioneve shqiptare, ka publikuar këtë të Diel të tjera materiale.
Në rrjetin social Telegram, grupi publikoi një folder me mail-e nga posta elektorike e kreut të SHISH, Helidon Bendo.
Pak ditë parë, grupi publikoi dhe disa pamje video, për të cilat shpjegon se janë materiale që janë filmuar nga Shërbimi Informativ Shtetëror.
Më 3 nëntor, po ashtu, publikuan një listë me punonjësit e SHISH, në një dokument prej 16 faqesh. Krahas emrave dhe funksioneve përkatëse të punonjësve të Shërbimit Informativ, u publikuan edhe e-mailet, ndërsa për disa, u afishuan edhe numrat e telefonit.
Më herët, hakerat publikuan një skedë me të dhëna personale të kreut të SHISH Helidon Bendo, ndërsa më pas edhe të bashkëshortes së tij.
Disa javë më parë, grupi “Homeland Justice” publikoi një listë me fluturimet e kreut të qeverisë Edi Rama, që shkaktoi debat, me opozitën që e akuzoi kryeministrin për shpërdorim të parave publike dhe kërkoi ngritjen e një komisioni hetimor.
Hakerat kanë publikuar një sërë informacionesh të tjera. Mes tyre edhe disa dokumente të klasifikuara sekret që dyshohet se u hakërruan nga posta elektronike e ish-kreut të Policisë së Shtetit Gledis Nano. Publikimi erdhi pak pasi Rama do të deklaronte publikisht se hakerat nuk kanë arritur të marrin të dhëna sekrete.
Discussion about this post