Në Prishtinë është hapur Edicioni i 15-të i Panairit të Edukimit. Përmes këtij panairi të rinjtë kanë mundësi të përfitojnë fonde të ndryshme si bursa, punë praktike, kurse të ndryshme dhe punësim. Të rinjtë që po vizitojnë këtë panair po vlerësojnë se panairet e tilla janë një mundësi e mirë për të ardhmen e tyre.
Edicioni i 15-të i Panairit të Edukimit, që është hapur sot në sallën “1Tetori”, vlerësohet i qëlluar, pasi të rinjtë kanë mundësi të përfitojnë fonde të ndryshme si bursa, punë praktike, kurse të ndryshme dhe punësim. Disa të rinj që ishin vizitorë të këtij panairi i thanë Radio Kosovës se presin të përfitojnë ndonjë mundësi për punë praktike apo edhe punësim.
“Studioj drejtimin e Gjeografisë e ky panair po na lidh me turizëm. Një gjë të mirë që e pashë është që po ofrohen mundësi për praktikë për studentë, sepse nuk kemi shumë mundësi në degën e turizmit”, thotë një student.
“Kështu që e pashë si një mundësi shumë të mirë për t`u inkuadruar përmes tyre. Është një mënyrë shumë e mirë për t`u informuar studentët për të nxjerrë sa më shumë rezultate dhe me pa se cilat janë mundësitë më të mira për studime, praktika të ndryshme dhe punësim.”
Se këto panaire ofrojnë mundësi të mira për të rinjtë e thotë në një përgjigje për Radio Kosovën Elmira Podvorica, koordinatore në Institutin Profesinal “ATC”, institut i cili përgatit të rinjtë në profesione të ndryshme për tregun e punës. Ajo tha se 90 për qind e atyre që ndjekin këto kurse, sigurojnë një vend pune.
“Programet të cilat ne ofrojmë janë: kuzhina, pastiçeria, piceria, ndihmës kuzhiniere. Mandej, kemi kurset e zanateve si: elektricisti, hidrauliku, automekaniku dhe menaxher biznesi”, thotë Podvorica.
“Në fund të secilit kurs, secili nxënës dhe studentë pajiset më certifikatë e cila njihet brenda dhe jashtë vendit. Në fund të programit automatikisht fitojnë një vend pune pasi kemi marrëveshje me shumë kompani të ndryshme.”
Po ashtu të rëndësishme këto panaire po i sheh edhe udhëheqësi i Divizionit për Shërbime të Punësimit, në Agjencinë e Punësimit, Fadil Osmani. Ai i tha Radio Kosovës se mbi 6 mijë qytetarë vitin e kaluar janë punësuar përmes ndërmjetësimit.
“Ky panair është edhe një indikator i mirë për të gjithë ata që duan të orientohen në karrierë. Nëse flasim me shifra, vetëm vitin e kaluar kemi pasur mbi 6 mijë punësime më ndërmjetësim”, thotë Osmani.
Qëllim kryesor i kësaj ngjarjeje është promovimi i punës së institucioneve edukative/arsimore, kompanive të ndryshme dhe ofron komunikim të drejtpërdrejtë me shoqërinë në përgjithësi.
Për të gjithë të interesuarit Edicioni i 15-të i Panairit të Edukimit do të jetë i hapur edhe të premten./Radio Kosova
Discussion about this post