Partia Demokratike ka reaguar pas postimit të kryeministrit Edi Rama se nisur nga dita e sotme është hapur për qarkullim Rruga e Arbrit.
Deputetja Dhurata Çupi ka publikuar një foto që tregon se rruga është e papërfunduar, ndërsa akuzon qeverisë se ka dështuar të mbajë premtimin dhe po qeveris me propagandë.
“Nxitimi për të shpallur, në ditën e ndarjes së shqiptarëve, hapjen e Rrugës së Arbrit, kur rruga akoma nuk ka mbaruar sipas kontratës, është, më e pakta, tallje me dibranët. Dështimi i qeverisë për të mbajtur premtimin e përfundimit të rrugës në prill dhe dështimi i premtimit për ta përfunduar rrugën në fund të këtij viti nuk mund të mbulohet nga propaganda e qeverisë”, shkrun Çupi.
Ndër të tjera, deputetja demokrate shkruan se rruga që ka kushtuar 400 miliardë lekë është e papërfunduar, dhe se qytetarët duhet të paguajnë deri në 8 euro për të kaluar aty.
“E vërteta është se rruga që na ka kushtuar 400 miliardë lekë është e papërfunduar dhe hapja e sotme është propagandistike. Në vend të mashtrimeve, qeveria duhet t’u thotë dibranëve dhe shqiptarëve a do të paguajnë ata deri në 8 euro për një udhëtim vajtje-ardhje në Rrugën e Arbrit, kur rruga të përfundojë sipas kontratës?”, shkruan ndër të tjera deputetja.
Punimet për rrugën e Arbrit nisën në verën e 2009 dhe brenda mandatit të demokratëve përfundoi njëri lot nga Bulqizë-Ura e Çerenecit. Në Qershor të 2018 nisën zyrtarisht punimet për këtë segment. Afati zyrtar për përfundimin e punimeve, sipas kontratës, është pranvera e 2022, por qeveria Rama nuk arriti ta përfundonte brenda afatit.
Discussion about this post