Ish-kryeministri i Kosovës, Ramush Hardinaj, e ka quajtur humbje kohe nismën “Open Balkan”. Përmes një interviste televizive ai tha se kjo nismë nuk mund të quhet kurrë e plotë pa u arritur njohja reciproke Kosovë-Serbi.
Haradinaj tha se, nuk sheh që kjo nismë do të ketë ndonjëherë sukses, pasi është e ndërtuar mbi ngërçe politike. “Nuk shoh suksesin e kësaj nisme. Radha e gjërave që duhet kryer në Ballkan nuk është kjo, por është njohja reciproke Kosovë-Serbi. Open Balkan është një çati e rrezikuar, rreziqet janë shumë të mëdha nga mosnjohja reciproke”, tha ai.
Ndërsa ka folur dhe për vizitën e Edi Ramës sot në Beograd, Haradinaj tha se këto veprime po kthejnë Ballkanin në hapa pas. Sipas tij, Rama dhe të tjerët po përpiqen të injorojnë Kosovën. “Të gjitha këto vizita jo vetëm që do të jenë humbje kohe, por Ballkani rrezikon të kthehet mbrapa. Pres prej Kryeministrit të Shqipërisë që ta bëjmë të qartë që nuk mund të ndodhë asgjë e mirë në Ballkan pa njohjen e Kosovës nga Serbia. Është humbje kohe. Nuk mund të bëjmë sikur nuk ekziston mosnjohja e Kosovës nga Serbia. Presioni që vjen nga Uashingtoni besoj se do ta ndryshojnë dinamikën e gjërave”, u shpreh ai.
Ndërsa e mbylli deklaratën e tij, duke thënë se pa njohjen e Kosovës “Open Balkan” është një gabim politik.
Discussion about this post