Ministri i Drejtësisë Ulsi Manja ka reaguar pas vendimit të disa avokatëve për të vijuar bojkotin e seancave deri ditën e premten pasi janë shprehur kundër hartë së re gjyqësore.
Manja shkruan në reagimin e tij se harta i ka kaluar për mendim KLP-së, Ministrisë së Financave dhe Prokurorisë së Përgjithshme për të marrë parasysh sugjerimet e avokatëve.
“Harta i ka kaluar për mendim KLP-së, Ministrisë së Financave dhe Prokurorisë së Përgjithshme. I kemi marrë parasysh sugjerimet e avokatëve për hartën e re gjyqësore. Avokatët të shohin rrugën e përballjes gjyqësore pasi harta e re gjyqësore të miratohet”, shprehet Manja.
Avokatët në Lushnje, Gjirokastër, Vlorë dhe Lezhë kanë bojkotuar edhe ditën e sotme seancat gjyqësore. Avokatët në Lezhë kanë marshuar nga ambientet e Gjykatës deri në Sheshin përballë Obeliskut në qendër. Po ashtu edhe avokatët në Vlorë kanë dalë në protestë para ambienteve të gjykatës.
Nga ana tjetër, Gjykatat i janë rikthyer normalitetit në qarqet Tiranë, Durrës, Fier, Berat, Dibër dhe Kukës. Pro hartës së re gjyqësore është shprehur dhe Shoqata Kombëtare e Gjyqtarëve duke argumentuar se shërbimi gjyqësor do të jetë më cilësor.
Discussion about this post