Për situatën në qytetin e Krujës, ka reaguar edhe Bashkia, e cila sqaron se si masë të parë pas marrjes së informacionit për helmimin e qytetarëve, Ujësjellës Kanalizime Krujë ka ndërprerë furnizimin me ujë të pijshëm për banorët e qytetit.
Sipas njoftimit të Bashkisë, janë kryer analizat e ujit në burim, në depot e qytetit dhe në pikat fundore të rrjetit shpërndarës dhe shkaku dyshohet të jenë reshjet e dendura të shiut që kanë rënë ditën e shtunë.
Në njoftim gjithashtu thuhet se në bazë të analizave që janë bërë ditën e djeshme, është vënë re prezencë e lartë të amoniakut.
“Ujësjellës Kanalizime Krujë ka ndërprerë furnizimin me ujë të pijshëm për banorët e qytetit të Krujës dhe nga ana e Njësisë Vendore të Kujdesit Shëndetësor janë kryer analizat e ujit në burim, në depot e qytetit dhe në pikat fundore të rrjetit shpërndarës. Gjithashtu, nga ana e Institutit të Shëndetit Publik janë marrë mostra të ujit dhe disa kampione tek pacientët e hospitalizuar për të analizuar dhe gjetur shkaqet më të detajuara.
Nga të dhënat paraprake të analizave fiziko-kimike të deritanishme, dyshohet se reshjet e dendura të shiut ditën e shtunë pasdite dhe në orët e para të ditës së diel, në të gjithë territorin e Bashkisë Krujë dhe në veçanti në Malësinë e Krujës ku ndodhen veprat e marrjes së ujësjellësit, të kenë sjellë kontaminimin e ujit të pijshëm, ku paraprakisht është konstatuar prezencë e amoniakut mbi normë” – thuhet në njoftimin e Bashkisë Krujë.
Ndërkohë që pritet një përgjigje përfundimtare të analizave më të detajuara mikro – biologjike nga ISHP.
“Gjithsesi ky rast mbetet për t’u verifikuar pasi analizat periodike te kryera nga laboratorët e NjVKSh përpara kësaj periudhe, kanë rezultuar të jenë në norma optimale. Dje janë analizuar edhe mostrat e ujit nga veprat e marrjes në Shkretë dhe në burimin e Livadheve, ku parametrat fiziko – kimike të cilëve kanë rezultuar të jenë vazhdimisht brenda normave. Sot, janë analizuar nga NjVKSh mostrat e marra nga depozitat e qytetit të cilat kanë rezultuar brenda normave të lejuara. Gjithsesi, jemi në pritje edhe të analizave më të detajuara mikro – biologjike nga ISHP, të cilat do të japin të dhëna më të detajuara të normave të komponentëve të ujit dhe do të shërbejnë për certifikimin e furnizimit në vijim të popullatës me ujë të pijshëm” – thuhet në njoftim.
Ujësjellës Kanalizime Krujë po vijon me dezinfektimin e depove të qytetit me anë te procesit të klorinimit, ndërkohë analizat fiziko–kimike dhe ato mikrobiologjike do të certifikojnë ri-fillimin e furnizimit me ujë të pijshëm për banorët.
