Ndonëse situata me helmimet në Krujë po shkon drejt një përmirësimi të lehtë, ende nuk është gjetur shkaku kryesor i incidentit që bëri që 500 qytetarë t’i drejtohen spitalit për ndihmë mjekësore.
Përzierja e ujërave të zeza me ujërat e bardha dyshohet të jetë bërë shkak i helmimit masiv të banorëve në Krujës, të paktën kështu deklaroi Ujësjellësi i Krujës, ndërsa shtoi se nga të dhënat paraprake të analizave fiziko-kimike të deritanishme, dyshohet se reshjet e dendura të kenë sjellë kontaminimin e ujit të pijshëm. Paraprakisht është konstatuar prezencë e amoniakut mbi normë.
Por, për të justifikuar gabimet Ujësjellësi gjithashtu ka fajësuar një stallë bagëtish në mal duke thënë se mbetjet që kanë rënë në ujë, kanë shkaktuar helmim. Stalla e bagëtive ndodhet sipër depove të Ujësjellësit e kaq ka mjaftuar që ky i fundit të largojë përgjegjësitë nga vetja. Por natyrshëm lind pyetja se përse nuk ka ndodhur më herët një ngjarje e tillë duke qenë se në vend ka pasur reshje të herë pas hershme shiu.
Prokuroria e Rrethit Gjyqësor Krujë, në bashkëpunim me shërbimet e Policisë ka nisur hetimet për veprën penale “Ndotja e ajrit, e ujërave dhe e tokës” në lidhje me helmimin e 500 qytetarëve të këtij qyteti. Sipas prokurorisë, është urdhëruar kryerja e akteve të ekspertimit mjeko-ligjor për të përcaktuar se cili ka qenë shkaku i helmimit të banorëve.
