Për helmimin masivë në Krujë disa ditë më parë, Prokuroria e Rrethit Gjyqësor Krujë ka marrë nën hetim 3 persona.
Nën hetim janë Ledio Çela Administrator i Ujësjellës Kanalizimeve Krujë, Andi Kupa Drejtues teknik, Ervin Karafili Shef i Shërbimit të Epidemologjisë dhe Higjenës Krujë.
Këta persona dyshohen se janë përgjegjës për kryerjen e veprës penale “Shpërdorim i Detyrës” që me veprimet e tyre kanë lejuar ndotjen e ujit të pijshëm dhe dëmtimin e shëndetit të qytetarëve të Krujës. Prokuroria e Rrethit Gjyqësor Krujë i ka pezulluar po ashtu edhe nga detyra të tre të akuzuarit.
Uji i pijshëm në Krujë, helmoi mbi 500 qytetarë, pasi rezultoi me ngarkesë bakteriale të esheria koli dhe streptokokut fekal. Nga analizat që i janë bërë ujit në ISHP janë zbuluar në prani të lartë dy baktere, Escherichia Coli dhe Streptokokut Fekal.
Dyshohet se uji është ndotur në burim, ndërkohë që në afërsi të depos së ujësjellësit ndodhet edhe një stan me bagëti. Esheria Koli është lloj bakteri që njihet për shkaktimin e irritimit në stomak. Simptomat përfshijnë diarrenë, dhimbjet në bark, vjelljen dhe marramendjet.
Shumë qytetarë në Krujë u paraqitën në spital me simptoma helmimi si dhimbje koke, dhimbje barku, diarre e të vjella. Furnizimi i qytetit me ujë u ndërpre për disa ditë ndërsa nevojat plotësoheshin me autobote ose duke u blerë në dyqane nga vetë banorët. Për helmimin pati edhe disa protesta nga qytetarët e Krujës.
Discussion about this post