Ka shkuar në 500 numri i qytetarëve që janë paraqitur në spitalin e Krujë për të kërkuar ndihmë shëndetësore, pas helmimit uji i pijshëm.
Sipas mjekëve, thuhet se ka një përmirësim të lehtë të situatës, ku nga mesdita e deri mëngjesin e sotëm janë paraqitur në urgjencën e spitalit rreth 150 qytetarë.
Nuk dihet nëse ka persona të shtruar në spital, pasi pjesa më e madhe e qytetarëve janë larguar pasi kanë marrë mjekimin e nevojshëm.
Ndërkohë, spitali i Krujës ka kërkuar që gazetarët të mos futen në ambientet e brendshme të ëktij spitali, duke kërkuar kështu ndihmën e policisë për pengimin e tyre.
Në orën 11 pritet të dalin edhe përgjigjet e analizave nga instituti i Tiranës, për të kuptuar edhe shkakun e helmimit të banorëve krutanë. Përzierja e ujërave të zeza me ujërat e bardha dyshohet të jetë bërë shkak i helmimit masiv të banorëve në Krujës. Kjo ishte deklarata e bërë nga Ujësjellësi i Krujës dhe tha se nga të dhënat paraprake të analizave fiziko-kimike të deritanishme, dyshohet se reshjet e dendura të kenë sjellë kontaminimin e ujit të pijshëm. Paraprakisht është konstatuar prezencë e amoniakut mbi normë. Një ditë pas helmimit masiv në Krujë, banorët kanë nisur të blejnë ujin për konsum, për shkak të dyshimeve se helmimi është shkaktuar nga uji i pijshëm. Shenjat kryesore të qytetarëve që kanë pasur probleme kanë qenë të vjella, diarre, dhimbje barku dhe temperaturë
Ndërkohë, Prokuroria e Rrethit Gjyqësor Krujë ka reaguar zyrtarisht për herë të parë në lidhje me helmimin e banorëve.
Hetimet për zbulimin e kësaj ngjarjeje, sipas Prokurorisë Fier po kryhen në drejtim të të shkaqeve që kanë çuar në helmimin e banorëve, në mënyrë që personat përgjegjës të përballen me përgjegjësi penale.
Prokuroria e Krujës njofton se në bashkëpunim me Policinë e Shtetit ka urdhëruar ekspertimi mjeko-ligjor dhe është në pritje të përgjigjieve të akteve të ekspertimit.
Në deklaratë thuhet se po kryen hetime në drejtim të analizave fiziko-kimike dhe bakteriale të ujit të pijshëm që furnizon qytetin e Krujës, si dhe veprime të tjera hetimore për zbardhjen e të gjitha rrethanave në lidhje me këtë ngjarje.
