Largimet nga puna në mënyrë të padrejtë u kanë kushtuar miliona lekë institucioneve në vend. Një pjesë e madhe e punonjësve të cilat janë pushuar, kanë fituar gjyqin me punëdhënësin e tyre. Në auditimin e bërë nga KLSH janë zbuluar një sërë shkeljesh nga ana e institucioneve, por pa lënë pas dhe fenomenin e heqjeve nga puna pa asnjë arsye. Punonjësit e hequr nuk kanë pasur asnjë problem, dosjet e tyre kanë qenë të bardha, ndaj edhe janë dëmshpërblyer. Duket se vendet e punës të cilat i ofrohen miqve e të afërmve të drejtorëve i kanë kushtuar shumë arkave të institucioneve.
Një institucion i cili ka pushuar një numër të madh personeli, madje duke humbur dhe gjyqin ndaj tyre është Drejtoria e Përgjithshme e Tatimeve (DPT) .
Në DPT janë liruar në mënyrë të padrejtë nga punë 198 punonjës, të cilët i kanë kushtuar buxhetit 377.6 milionë lekë. Detyrimi i mbetur për DPT më 31.12.2020 për zbatimin e vendimeve gjyqësore për punonjësit e larguar nga puna është në vlerën 184.7 milionë lekë për 168 punonjës.
Në Fondin e Sigurimeve të Detyrueshme të Kujdesit Shëndetësor (FSDKSH) është konstatuar se për vendimet gjyqësore për largim të padrejtë nga puna, janë paguar detyrime në vlerën 28.6 milionë lekë dhe mbeten për tu likuiduar detyrime në vlerën 7.9 milionë lekë.
E njëjta gjë ka ndodhur dhe në Ministrinë e Financave dhe Ekonomisë, ku janë konstatuar heqje nga puna në mënyrë të padrejtë ku punonjësit e pushuar janë dëmshpërblyer nga buxheti i institucionit. Në bazë të Vendimit Gjyqësor të formës së prerë për ish-punonjës të larguar padrejtësisht nga puna janë bërë pagesa në vlerën 23 milionë lekë. Gjithashtu është konstatuar se si pasojë e mos ekzekutim vullnetar të vendimeve gjyqësore për punonjësit e larguar nga puna, të cilët për ekzekutimin e këtyre vendimeve kanë kontraktuar përmbarues privat, të cilat kanë shkaktuar efekte financiare negative për buxhetin e shtetit në vlerën 4.6 milionë lekë.
Në Ministrinë e Shëndetësisë dhe Mirëqenies Sociale është konstatuar një diferencë në raportimin e detyrimeve të prapambetura për largime të padrejta nga puna në vlerën 6.7 milion më pak se Pasqyrat Financiare. Gjithashtu janë shlyer detyrime për vendime gjyqësore në vlerë 9.2 milion lekë, ndërsa nga auditimi rezultoi se, detyrimet e prapambetura realisht të shlyera janë në vlerën 42.5 milion lekë.
Gjatë auditimit të bërë nga KLSH janë konstatuar dhe shkelje të tjera të këtyre institucioneve duke përmendur këtu mungesën e dokumentacioneve, punësimet e personave pa kualifikim etj. Pra, këto shkelje pasojnë më pas në pushimet nga puna të cilat i shkaktojnë dëm të madh ekonomik institucioneve publike.
Discussion about this post