Sot, Erion Veliaj, nga burgu i Durrësit, mori në mbrojtje oligarkun Shkëlqim Fusha, ndaj të cilit është vendosur masa detyrim me paraqitje, duke hedhur sulme ndaj prokurorit dhe gjyqtarit që janë marrë me çështjen e tij dhe të Ajola Xoxës.
Veliaj e quajti Shkëlqim Fushën biznesmen të ndërtuar, ndërsa hodhi një mori fyerjesh për prokurorin e çështjes së tij.
Në fakt nëse do të shkojmë më tej kuptohet gjithë lidhja e ngushtë e Erion Veliajt me Shkëlqim Fushën dhe arsyen pse e mbron aq shumë.
Shumë e thjeshtë, Fusha ka bekuar me miliona OJF-të e Ajola Xoxës, ndërsa Veliaj e ka shpërblyer me leje ndërtimi, po ashtu me miliona për ndërtimin, mirëmbajtjen dhe pastrimin e sheshit “Skënderbej”, etj.
Ky fakt evidentohet dhe në dosjen hetimore të zbardhur nga gjykata.
“‘Fusha’ sh.p.k. ka përfituar nga Bashkia Tiranë lejen e Ndërtimit Nr. Prot. I-8789/8, dt. 23.11.2020, ‘Banesë individuale 1 kat, me mur rrethues’ ndodhur në Yrshek, Tiranë, në pronë të z. Glentjan Karaj, me zhvillues z. Glentjan Karaj dhe subjekt ndërtues shoqëria ‘FUSHA’ sh.p.k., viti 2020. Afati i lejes 27 muaj. Gjithashtu, me shkresën Nr. 204 Prot., datë 09.11.2020 shoqëria ‘Fusha’ sh.p.k. ka paraqitur pranë Bashkisë Tiranë kërkesën me objekt: ‘Likuidim garancie punimesh’, që rrjedhinin nga zbatimi i punimeve në objektin ‘Rikualifikimi Urban i Sheshit Skënderbej, Faza e II-të’, në vlerën 58, 732, 731 lekë.
Gjithashtu, shoqëria ‘Fusha’ sh.p.k. ka marrë pjesë në procedurën e prokurimit të shpallur me Urdhrin e Prokurimit Nr. 41302 Prot., datë 23.11.2020 për objektin ‘Shërbimi i Pastrimit të Tiranës’ Loti IV ‘Shërbimi i Pastrimit të Zonës Tirana IV’, nënshkruar nga kryetari i bashkisë Tiranë Erion Veliaj. Pra, vetëm 3 ditë pas përfitimit të lejes në fjalë, si dhe gjatë kohës që ishte në pritje të shqyrtimit të kërkesës nga Bashkia Tiranë e bërë nga shoqëria nga ‘Fusha’ sh.p.k. më datë 09.11.2020 me objekt: ‘Likuidim garancie punimesh’, që rrjedhinin nga zbatimi i punimeve në objektin ‘Rikualifikimi Urban i Sheshit Skënderbej, Faza e II-të’, në vlerën 58, 732, 731 lekë, si dhe tri ditë pasi është nxjerrë Udhri i Prokurimit Nr. 41302 Prot., datë 23.11.2020 (ku doli fitues më pas), subjekti tregtar ‘Fusha’ sh.p.k. është faturuar me një shumë prej 2,672,568 lekë nga dy personat fizikë, të kontrolluar plotësisht nga shtetësja Ajola Xoxa, të cilët nga ana e tyre, vetëm 4 ditë më pas, faturohen nga ‘Harabel’ duke i kaluar gjysmën e të hollave kësaj-organizate”, thuhet në dosje.
Por shkojmë përtej këtij fakti. Veliaj është aq i lidhur me Çim Fushën sa një rruge në Tiranë i ka vënë emrin e tij.
Megjithëse emrat e njerëzve të njohur apo figurave publike përdoren për emërtimin e rrugëve pas ikin nga jeta, në rastin e Fushës, Veliaj ia ka vënë për së gjalli për merita të mëdha.
Kjo është arsyeja pse Veliaj po i bën dhe avokatinë Çim Fushës. Lidhjet janë më të thella sesa ato që ka nxjerrë vendimi i gjykatës.
/ CNA /
Discussion about this post