Prokuroria e Posaçme Antikorrupsion po vijon hetimet për lobimin e ish presidentit Ilir Meta në SHBA. SPAK i ka kërkuar bankave të dhëna për llogaritë bankare të LSI dhe transaksionet e kryera drejt zyrave të lobimit.
SPAK i ka kërkuar KQZ pasqyrat financiare të depozituara nga LSI përgjatë fushatave elektorale pasqyra në te cilat raportohet edhe zërat e shpenzimeve lobim. Mësohet se hetimet po drejtohen nga vetë kreu i SPAK Arben Kraja dhe Prokurori Sotir Kllapi.
Dy ditë më parë i kërkoi KQZ formularin e vetëdeklarimit të Kreut të Partisë së Lirisë. Kërkesa e SPAK-ut vjen në kuadër të hetimeve për skandalin për lobim në SHBA me 700,000 mijë USD të padeklaruara. Kallëzimin e ka depozituar në SPAK ish deputeti Halit Valteri. Kallëzimi penal nga Valteri ishte rrjedhojë i investigimit të gazetës më të madhe austriake, e cila akuzoi se presidenti Ilir Meta pagoi 700,000 mijë dollarë për lobim përmes një kompanie qipriote guaskë, që të siguronte një foto në ceremoninë e inaugurimit të Presidentit Amerikan Donald Trump.
Meta po hetohet nga SPAK për korrupsion pasiv parashikuar në nenin 259 të Kodit Penal, vepër e cila dënohet me burgim nga 3 deri në 8 vjet. Gjithashtu, Meta po hetohet edhe për falsifikimin e vulave, stampave ose formularëve, parashikuar në nenin 190/3 të Kodit Penal, vepër për të cilën parashikohet nga 3 deri në 7 vite burg.
Discussion about this post