Dy ditë më parë u bë më dije se SPAK ka nisur një hetim ndaj kryetarit të Bashkisë Tiranë Erion Veliaj. Më herët Veliaj u shpreh se SPAK po heton një wc provizore te shkolla “Sami Frashëri”, teksa u shpreh i bindur se prokurori do dalë në përfundimin se nuk ka abuzime.
Megjithatë lëvizja e organit të akuzës, ka bërë që Veliaj të shfaqet në ekran dhe të kërkoj një “paqe” me opozitën, pasi denoncimet publike po i merr seriozisht SPAK. Megjithëse ai shfaqet i merakosur për investitorët e huaj, shqetësimin real e ka për hetimet që kanë nisur ndaj tij.
“Këto janë marrëzi! Jemi në vitin 2022! Nuk mund t’i bëjmë gjëra të tilla. Ndaj, jo vetëm ndihem i turpëruar sot dhe kërkoj ndjesë për atë minorancë të zhurmshme – të cilën e mirëkuptoj kur politizohet me kryetarin e Bashkisë në debatin për Sheshin, për Liqenin, “kullat” te Sami Frashëri etj., e çudira shqiptare për të cilat ne na është ‘bërë lëkura shollë’, – por, kjo nuk është normale! Ne duhet të bëjmë një pakt kombëtar që, për gjëra që kanë një interes kombëtar, për ata që bëjnë investime filantropike si Fondi, duhet të kërkojmë kush është AADF-ja tjetër, që të bëhen 2 e 3, 13, 33, jo të përzëmë ata që kemi. Kjo nuk na nderon! Pavarësisht bindjeve që kemi, na duhet një pakt kombëtar. Ne nuk i themi dot suksesit plaç. Ne nuk bëjmë dot teori konspiracioni për çdo të lajthitur që fantazon. Duhet besim”, tha Veliaj.
Këto deklarata ai i bëri duke prezantuar bashkëpunimin me Fondin “Crimson Finance Albania” (CFFA), që së fundmi ka sjellë një partner të ri “Helenos”, një shoqëri private investimi me seli në Belgjikë.
Kujtojmë se akuzat e Partisë Demokratike për ndërtimin pa projekt dhe pa leje të Shkollës së Mesme “Sami Frashëri” nisën në momentin kur kryebashkiaku Veliaj gënjeu se “shkolla do të rindërtohet me fondet e Bashkimit Europian”. Në mbrojtje të Veliajt, duke sulmuar SPAK-un ka dalë edhe kryeministri Rama, ndërkohë që nuk ka reagim nga organi i akuzës.
Discussion about this post