Deklaratat e Kryeministrit Edi Rama janë një shembull i qartë i degradimit të gjuhës politike dhe përdorimit të termave diskriminues në retorikën publike. Shembulli i fundit vjen nga Lushnja, ku gjatë një takimi elektoral këtë të hënë, Rama përdori terma si “qorr” dhe “shurdh” për të sulmuar opozitën dhe listën e saj të kandidatëve për zgjedhjet parlamentare.
“Ajo është listë për në opozitë, me një tufë qorrash, shurdhësh dhe kuakuakuash në opozitë. Vetëm recitojnë, kua kua kua. Është bërë gati, jo për të liruar TikTokun në 12 Maj, por do thonë na i vodhën”, u shpreh kryesocialisti në takim me kandidatët për deputet të PS në këtë qytet.
Këto deklarata ngrenë dy probleme të mëdha: përdorimin e një gjuhe të ulët nga një lider shtetëror – që në fakt nuk është një risi nga kryeqeveritari dhe bullizimi i personave me aftësi ndryshe.
Në vend të një diskursi përmbajtjesor mbi sfidat dhe zgjidhjet për vendin, etiketimet dhe talljet personale e largojnë politikën nga funksioni i saj i vërtetë dhe minojnë kulturën demokratike. Një lider i përgjegjshëm supozohet të shmangë gjuhën fyese dhe të promovojë një komunikim të ndërtuar mbi argumente dhe ide, duke treguar respekt për të gjithë qytetarët.
Një aspekt edhe më shqetësues i deklaratës së kreut të qeverisë është përdorimi i termave “qorr” dhe “shurdh” në një kontekst negativ. Këto fjalë nuk janë thjesht një mënyrë për të etiketuar opozitën, por dërgojnë një mesazh të gabuar dhe diskriminues për personat me aftësi ndryshe.
Kjo lloj retorike kontribuon në: Normalizimin e diskriminimit, duke përdorur paaftësitë fizike si sinonim për mungesë intelekti ose paaftësi politike; Margjinalizimin e komuniteteve me aftësi ndryshe, duke u dërguar atyre një mesazh se shoqëria dhe liderët e saj i shohin si të pavlefshëm ose të dobët; Përhapjen e stereotipeve negative, që dëmtojnë përpjekjet për një shoqëri më të barabartë dhe gjithëpërfshirëse.
Për më tepër, ky episod bie në kontrast të fortë me vendimin e qeverisë së tij për të mbyllur platformën TikTok, të cilën ai e ka cilësuar si “rrugaçi i lagjes”, duke argumentuar se ndikon negativisht në edukimin e brezave të rinj. Pra, veprimet dhe gjuha e tij përbëjnë një kontradiktë të qartë: ndërsa pretendon të mbrojë të rinjtë nga gjuha dhe përmbajtjet e dëmshme të rrjeteve sociale, ai vetë përdor një retorikë që promovon përbuzjen, përçarjen dhe bullizimin.
Discussion about this post