Fadil Muqollit, është ish-ushtar i UÇK, i cili ka treguar një intervistë televizive historinë e trishtë që na preku të gjithëve dhe na kthen panoramën e keqe të veprimeve makabre që serbët bënin ndaj kosovarëve. Ai ka treguar se, forcat serbe ia vranë katër fëmijët, bashkëshorten, prindërit, gruan e vëllait dhe dy fëmijët e vëllait në Masakrën e Poklekut ku u vranë e shkrumbuan 47 njerëz.
Muqolli rrëfen që familja e tij nuk ishte në pozicion të mirë për t’u fshehur në pyll, ndërkaq kur kishin shkuar në Drenas, forcat serbe i kishin kthyer prapa. “Më 17 prill 1999 mbi fshatin tonë u bë një sulm i tmerrshëm nga të gjitha anët. Ne ishim në fshat. Unë isha ushtar i Ushtrisë Çlirimtare të Kosovës mirëpo fuqia jonë për t’i ndalë forcat serbe ishte e pamundur. Ishte një ushtri shumë e madhe por edhe me arsenal shumë të madh”, ka thënë Muqolli.
Mes dhimbjes, Muqolli tregon se serbët e tërbuar kishin mbërritur në fshat me synimin për të bërë masakra dhe në çdo shtëpi që hynin vrisnin njerëzit pa pikë mëshire. “Ata hynë vetëm e vetëm për të bërë masakra. As s’ka pas asnjë provokim. Familja ishte në shtëpi. Atë ditë është nisë ofensiva diku afër orës 6 të mëngjesit. Pozicioni i lagjes sonë ku ishim nuk kish mundësi të largohen dhe të ikin në pyll”, tha ai.
Muqolli thotë se forcat serbe e kishin detyruar familjen e tij të kthehej në fshat ku më pas gjetën vdekjen mizorisht. “Baba im ka refuzuar me u kthyer. Policët serbë kanë gju në ajër dhe u kanë thanë: kthehuni ose do t’ju vrasim. Atë ditë ka qenë dita e 17 prillit, ka qenë ditë me shi, ditë e ftohtë”, u shpreh Muqolli.
Më tej ai tregon se Forcat e UÇK nuk mundën t’i ndalonin pasi mendonin që familjet ishin kthyer në bazë të urdhrit nga Serbët, por jo ata nuk ishin bindur dhe armiku nuk i kurseu. “Familja u kthye në shpi të vet edhe kanë hy në shpi forcat serbe. S’mundëm me i ndalu, kanë hy në fshat. Na nuk e kemi ditë se janë kthye familja ne kemi menduar se familja ka dalë në Drenas edhe jemi largu prej pozicioneve sepse kemi pas sulme të tmerrshme”, tha ai
Ai më pas rrëfen se si fillimisht ia kishin vrarë babanë, dhe më pas forcat serbe ishin kthyer dhe e kishin bombarduar dhomën ku ndodheshin 51 vetë, mes tyre edhe shumë fëmijë – prej foshnjës gjashtëmuajshe e deri te fëmija 13-vjeçar.
“Edhe janë hi forcat serbe në oborr, kanë shkuar në shpi. Kanë qenë 53I kanë nxjerrë jashtë, i kanë numëruar edhe i kanë futë brenda prapë. Pas 10 minutash janë kthyer kanë hi brenda e kanë marrë babën Sinanin dhe Imer Elshanin, shkrimtarin e fëmijëve. I kanë qitë jashtë 30 metra prej shtëpisë edhe i kanë ekzekutuar”, tha ai.
Sipas tij, nga tmerri që po shihnin dhe kolapsi i krijuar familja e tij ishin në një dhomë që po strehoheshin 51 veta dhe serbët iu kanë hedhur bombë brenda. “Ua kanë hapë derën edhe i kanë gju dy bomba. Kur u qetësuar prej bombave, kanë hy me pushkë automatike deri sa kanë menduar që i kanë vra të gjithë”, ka deklaruar ai. I brengosur Muqolli tha se këto janë plagë të gdhendura që nuk harrohen kurrë edhe nëse të tjerët përpiqen të deformojnë të vërtetat.
Discussion about this post