Qeveria holandeze u ka kërkuar falje qindra ish-ushtarëve të dërguar për të mbrojtur zonën e Srebrenicës gjatë luftës në Bosnje.
Kryeministri Mark Rutte u shpreh se forcat holandeze nuk ishin pajisura si duhet për të ndaluar masakrën dhe iu kërkua të kryenin një detyrë të pamundur.
Në korrik 1995, rreth 8,000 burra myslimanë u masakruan pasi forcat ushtarake holandeze u rrethuan nga forcat serbe të Bosnjës. Qeveritë holandeze kanë këmbëngulur se faji ishte i OKB-së pasi dështoi në ofrimin e mbështetjes ajrore për trupat holandeze.
Duke folur me veteranët në Holandën qendrore, kryeministri holandez pranoi se ushtarët e forcës paqeruajtëse Dutchbat III nuk ishin të pajisur si duhet si duhet dhe nuk morën mbështetjen ushtarake të nevojshme.
“Sot iu kërkoj falje në emër të qeverisë holandeze të gjitha grave dhe burrave të Dutchbat III. Të gjithë ju këtu dhe atyre që nuk janë me ne sot. Me vlerësimin dhe respektin më të madh të mundshëm për mënyrën në të cilën Dutchbat III u përpoq të bënte gjënë e duhur, në rrethana shumë të vështira”, u shpreh Rutte.
Përveç kërkimit të faljes, ushtarëve holandezë të Srebrenicës iu dha edhe Medalja e Bronztë e Nderit nga Ministrja e Mbrojtjes Kajsa Ollongren.
Në korrik 1995, në mes të një fushate gjenocidi nga forcat serbe të Bosnjës, mijëra muslimanë ikën në një zonë të sigurt të OKB-së në Srebrenicë. Ata mbroheshin nga trupa holandeze të pajisura me armë të lehta, të cilat u rrethuan gjatë një avancimi të serbëve të Bosnjës.
Pasi siguruan dorëzimin e forcave holandeze, trupat serbe të Bosnjës nën drejtimin e gjeneralit Ratko Mlladiç morën mënjanë burra dhe djem nga mosha 12 deri në 77 vjeç. Gjatë pesë ditëve të ardhshme, ata u ekzekutuan dhe u varrosën në varre masive nga trupat e Mlladiç.
Serbia gjithmonë ka mohuar se vrasjet ishin pjesë e një fushate gjenocidi, por pranon se ishte një krim.
Discussion about this post