Kandidati i “Bashkë Fitojmë” për Bashkinë e Vorës, Indrit Hoxha, ka denoncuar kryebashkiakun aktual, Blerim Shera, i cili sipas tij para se të merrte detyrën ishte në shtëpi me qira, ndërsa tani ka 4 apartamente.
Ai u shpreh se SPAK duhet të hetojë pasurinë e kryetarit të bashkisë së Vorës, ndërsa hodhi akuza se Shera po u bën presion qytetarëve.
“Familjet që presin të marrin apartamentet sa i takon projektit të rindërtimit, po iu bëhet presion, ku iu kërkohet vota”, tha ai.
Indrit Hoxha dha detaje në lidhje me kallëzimin që depozitoi sot në Prokurorinë e Posaçme për një tenderi mbi pastrimin në këtë bashki.
“Bëhet fjalë për një procedurë tenderimi e kryer në 2022-in mes bashkisë së Vorës dhe një kompanie, Acko impeks. Jo vetëm që ka shkelje procedura, por janë dhe 9 procedura të tjera që do i kallëzojmë në SPAK. Vlera e abuzimeve është 16 mld lekë, për disa çështje. Po ashtu është dhe një tender për pastrimin në mënyrë emergjente në Vorës, sikur kjo bashki të kishte ndonjë virus. Vora tashmë është bashkia më e pistë.
SPAK duhet të zbarkojë në zyrat e bashkisë, të nisë hetimin e thelluar, që të çojë para përgjegjësisë, përgjegjësit. Bashkia e 61 sa i takon pastërtisë. Ne disponojmë studime dhe dokumente sa i takon këtyre shkeljeve. Kompania në fjalë nuk është vënë në lëvizje, nuk ka pastruar asnjëherë. Koshat e mbeturinave janë të tejmbushur. Kompaninë e drejton Sadri Abazi. Për mua ka rëndësi shkelja që ka bërë kryetari i bashkisë.
Ne po përgatisim një raport dhe për diplomatët e huaj në vend. Vora nuk ka luks për këto zyra. S’jemi bashkia e Parisit. Nuk dihet se ku janë zyrat e bashkisë së Vorës, kanë marrë zyra me qira.
Një zyrë është në një cep të qytetit, tjetra në cep tjetër. Këto rëndojnë xhepat e qytetarëve. Dita e parë që do të vijë në pushtet, do të kthejë atje ku ishte bashkia e Vorës. Këta e kanë falimentuar bashkinë e Vorës. Ça përpara janë këta? Këta janë buzë greminës.
SPAK të hetojë pasurinë time dhe të kryetarit të bashkisë së Vorës. Ai kur mori detyrën ishte në shtëpi me qira, tani ka 4 apartamente në Vorë. Kryetari i bashkisë së Vorës po bën presion qytetarëve. Familjet që presin të marrin apartamentet sa i takon projektit të rindërtimit, po iu bëhet presion, ku iu kërkohet vota.”, u shpreh Indrit Hoxha
Discussion about this post