Botohet për herë të parë në shqip libri “Heshtja”, rrëfimi i një polici të Antimafias, i autorit Gianni Palagonia që njihet me pseudonimin “Giuseppe Monforte”.
Ky libër paraqet tablonë e një mafieje siçiliane, që sot punon në hije, veshur me xhaketë e kravatë, nën tingullin e tenderëve të mëdhenj, punëve të pista dhe korrupsionit, nga zëri i një polici, që nuk i lë rehat. Një histori këmbënguljeje dhe zemërimi, për të kuptuar se me mafien jetohet çdo ditë. Autori i librit ka punuar disa vite me misionin policor italian në Shqipëri dhe jeton përkohësisht në Tiranë.
Monforte njihet kryesisht si autori i librave “Il silenzio”, “Nelle mani di nessuno” dhe “L’aquila e la piovra”, të cilat tregojnë jetën e tij të vërtetë personale dhe profesionale në një mënyrë të trilluar, si dhe operacionet që ai kreu në luftë kundër krimit të organizuar, mafies dhe terrorizmit të brendshëm.
Në vitin 2008, “Heshtja” u kthye në një bestseller, pasi u botua edhe në Itali, Gjermani dhe Holandë.
Ndërsa në vitin 2019, ai u zgjodh nga Endemol Shine Italy për të marrë pjesë në edicionin e parë të një formati të ri “reality show”, realizuar nga Amazon Prime Video, të titulluar “Celebrity Hunted” ose njohur ndryshe si “Caccia all’uomo”, ku interpretoi investigatorin në skuadrën e përzgjedhur nga kolosi mediatik, për të kryer aktivitetet hetimore dhe të inteligjencës, të një sërë personazhesh të famshme televizive si lojtari i famshëm Francesco Totti dhe këngëtari i njohur Fedez.
Autoro, Sapo ka nënshkruar kontratën me Amazon për botimin e tre librave të tij (“Il silenzio” – “Nelle mani di nessuno” – “L’aquila e la piovra”) në formatin “audible”. Kjo kontratë gjithashtu parashikon botimin e librit të katërt që pritet të publikohet së shpejti në Itali.
