Lajmi i ndarjes nga jeta prej Covid-19 e komentatorit të njohur sportiv, Kosta Grillos ishte shumë i dhimbshëm për të gjithë sport dashësit shqiptarë.
Teksa ka folur në një intervistë për MCN TV, gazetari sportiv dhe miku i vjetër i Kosta Grillos, Ervin Baku u shpreh se kjo humbje ishte shumë e madhe për të gjithë.
Më tej ai shtoi se Kosta Grillo u hoq nga puna në RTSH padrejtësisht dhe tha se ky largim ishte shumë i rëndë për komentatorin duke i shkaktuar një plagë që nuk u mbyll kurrë.
“Kosta Grillo ishte zëri i Kombëtares shqiptare, prej një jete ishte një gazetar dhe menaxher i suksesshëm. Do mbetet i pavdekshëm i Kombëtares. Një zë që para 3-4 vitesh, e hoqën nga puna padrejtësisht në RTSH. Për mendimin tim, e vranë shumë aty. Grillo e donte jetën, luftoi deri në fund. Më kujtohet buzëqeshja para se të futej në reanimacion. Ai sot është një yll, që iu bashkohet yjeve në qiell. Për mendimin tim, do vazhdojë të komentojë aty në qiell lojtarët e mëdhenj që janë ngjitur atje lart. Ishte një njeri me shpirt të pastër. Është një humbje e madhe. Lum ata që e kanë njohur nga afër.
Largimi nga RTSH ishte një padrejtësi e madhe. Kjo është Shqipëria, nisur me hipokrizi. Si mund të largohet nga puna zëri i Kombëtares?! Për këtë, njerëzit duhen dashur dhe vlerësuar sa janë gjallë. Kosta e kishte shpirtin e plagosur, pasi u hoq padrejtësisht. Një ditë të bukur sepse i teket dikujt, ai hidhet në rrugë padrejtësisht.”-tha ndër të tjera Ervin Baku.
Kosta Grillo ka komentuar ndeshjet më të rëndësishme dhe jo vetëm, sportive për rreth 30 vite dhe ishte zëri që të gjithë shqiptarët dëgjonin me emocion të madh në çdo ndeshje./K.T/Gijotina.com
