Ndryshimi i masave anti-Covid në Maqedoninë e Veriut ka reduktuar ndjeshëm lëvizjet drejt vendit fqinj nga pika kufitare e Qafë-Thanës. Personat që nuk kishin një certifikatë vaksinimi ose tampon 48 orësh nuk u lejuan të hyjnë. Edhe qytetarët që kishin marrë vetëm një dozë të vaksinës anti-Covid u kthyen pas nga pala kufitare.Masat gjithashtu janë të vlefshme edhe për fëmijët mbi moshën 6 vjeç.
Vetëm për këtë arsye, në Qafë Thanë ka pasur dhjetëra familje që janë kthyer pas.
Një shtetas nga Tetova me profesion mjek thotë për mediat se kjo është anormale. Sipas tij, është krim t’i bësh fëmijës rapid test, kur në Maqedoni dhe çdo vend të rajonit nuk ka masa të tilla.
Ndërkohë që ky tampon në Maqedoni kushton 2 euro, kurse në Qafë Thanë kompania private kërkon 25 euro.
“Ky është një turp që bën shteti shqiptar”, thotë ai.
Gjithashtu një problematikë tjetër, e cila ka nisur nga sot në Qafë Thanë, është se dokumentat, certifikatat ose tamponi iu kërkohen edhe kamionistëve, ndërkohë që në vende të tjera nuk u kërkohen.
Autoritetet doganore presin të krijohen lehtësira për këtë kategori
Për datën 05 shtator, në Kapshticë kanë hyrë 2095 dhe kanë dalë 2280 shtetas të huaj dhe shqiptarë. Kurse në Qafë-Thanë, kanë hyrë 2122 dhe kanë dalë 1742 shtetas të huaj dhe shqiptarë.
