Ish-drejtuesja e SHISH, Vlora Hyseni është paraqitur sot përpara Gjykatës së Posaçme kundër Korrupsionit dhe Krimit të Organizuar, ku do të merret në pyetje në lidhje me masën e sigurisë të caktuar ndaj saj. Hyseni ishte e shoqëruar me efektivë policie.
Seanca është parashikuar të zhvillohet në orën 12:00, ndërsa Hyseni ndodhet nën masën e sigurisë “arrest në shtëpi” dhe pezullim nga ushtrimi i detyrës.
Masat janë kërkuar nga SPAK në kuadër të hetimeve për dosjen ku është përfshirë edhe biznesmeni Ergys Agasi.
Hyseni, ish-drejtuese e Shërbimit Informativ të Shtetit, është nën hetim për veprat penale të parashikuara nga nenet 302/2 dhe 295/a/1 të Kodit Penal, që lidhen me përkrahjen e autorit të krimit dhe zbulimin e akteve apo të dhënave sekrete.
Hetimi lidhet me komunikimet e saj të pretenduara me Ergys Agasin dhe me të dhëna që, sipas materialeve të bëra publike nga hetimi, dyshohet se janë përcjellë tek ai. Hyseni ka deklaruar se Agasi ka qenë bashkëpunëtor i SHISH, ndërsa SPAK ka kundërshtuar këtë pretendim, duke argumentuar se strukturat përkatëse nuk ishin njoftuar për një bashkëpunim të tillë.
Në të njëjtin procedim, GJKKO la në fuqi masat “arrest në burg” për Fatjon Kalluçin dhe Embro Sulejmanin, të cilët dyshohen se kanë përkrahur Agasin gjatë kohës që ai ishte në kërkim.
Seanca ndaj Hysenit pritet të përcaktojë vijimin e masës së sigurisë, ndërsa hetimet e SPAK për çështjen vijojnë. Deri në një vendim përfundimtar të gjykatës, personat nën hetim gëzojnë prezumimin e pafajësisë.
Discussion about this post