Lush Osmani është biznesmeni i radhës që është gostitur me një super tender nga Lali Eri në prag të zgjedhjeve vendore. Me datë 16 janar 2023, kryebashkiaku Veliaj dhe Lush Osmani kanë firmosur kontratën më vlerë 600 milionë lekë. Bëhet fjalë për tenderin me objekt “Rruga për tek Liqeni Çerkezës”. 15 kompani kanë paraqitur oferta, por të gjitha janë skualifikuar në një ditë dhe në garë ka mbetur vetëm firma “Shpresa-AL” e Lush Osmanit. Ky prokurim që është zhvilluar pa një garë të mirëfilltë do të thotë se, sërish Veliaj ka firmosur për një tender abuziv.
Open Data Albania e ka klasifikuar në tenderët me “Red Flag” dhe ngre alarmin e riskut të abuzimit që sjellë kontrata. 600 milionë lekë për një rrugë që është ekzistuese. Por ka nevojë vetëm për riparime, mund t’i shpenzojë vetëm Veliaj me miqtë e tij!
Rruga për në Liqenin e Çerkezës ka sjellë ankesa edhe më herët. Por Bashkia nuk ia kishte hedhur kurrë sytë, derisa u kujtua se duhen votat e qytetarëve. Edhe pse kemi hyrë në periudhën kur kryebashkiakëve nuk iu lejohet të zhvillojnë tenderë, për shkak të zgjedhjeve që po afrojnë, vetëm në këto dy javët e para të janarit, Veliaj i numëron të paktën 5 tenderë në shkelje të ligjit. Vëmë re se këto tenderë janë kryesisht për asfaltim rrugësh dhe rregullim fasadash. Konkretisht, projekte elektorale që tërheqin syrin e votuesve.
Abuzimet e Lush Osmanit
Lush Osmani njihet për fondet e mëdha që përfiton përmes Shpresa.al por, edhe kompanive të tjera që ai zotëron. Gjithsesi, do mbetet gjithmonë absurde se si ai fitonte kontrata edhe në kohën kur ishte nën hetim nga SPAK për korrupsion. Në 25 tetor të 2019, Policia e Durrësit shpalli në kërkim me urdhër të prokurorisë pronarin e kompanisë ‘Shpresa.al”, Lush Osmani. I dyshuar si organizator dhe përfitues si skemës së tjetërsimit tokë shtetërore pranë Kepit të Rodonit.
Osmani u shpall në kërkim policor si i dyshuar edhe për përfitimin e një godine në mënyrë korruptive si pjesë e një grupi të strukturuar kriminal dhe disa javë më pas, Osmani u vetëdorëzua në Policinë e Durrësit.
Fillimisht Prokuroria kërkoi izolimin e tij. Por më pas, e ndërroi masën në “Detyrim paraqitje” kundrejt garancisë pasurore dhe Gjykata e Durrësit e liroi. Mirëpo, llogaritë e hapura me drejtësinë nuk e kanë penguar Osmanin të jetë i preferuari i qeverisë për tenderë.
Pikërisht në këto kohë, ai ka fituar prokurimin me objekt “Blerje Karburanti” nga Bashkia Kamëz. Miliona lekë të xhiruara pa garë. Përveç tenderit të sipërpërmendur, ndërsa ishte nën hetim nga Prokuroria e Durrësit, Osmani ka marrë një tjetër tender pa garë. Nga Drejtoria e Përgjithshme Nr. 1 e Punëtoreve të Qytetit Tiranë, me objekt blerje vaj, në datën 30 janar 2020.
Ndërkaq, në 5 vitet e fundit Lush Osmani ka marrë nga shteti rreth 700 tenderë me vlerë 1.554.148.983 lekë. Këto fakte tregojnë se SPAK ia lë rrugën të lirë Veliajt dhe miqve të tij të abuzojnë me buxhetin e shtetit..
Lexo edhe: Firma që pengoi Censusin/ Veliaj i jep 800 mln për klor dhe laptopë
Discussion about this post