Erion Veliaj nuk e ka problem të bëj biznes me oligarkë të akuzuar për abuzime, sidomos kur është fjala për tendera. Këtë herë ai ka ftuar Lush Osmanin, pronarin e “Shpresa AL”. Në datë 20 tetor Bashkia Tiranë ka mbyllur tenderin për blerje karburanti. Ky prokurim mban numrin e referencës REF-43723-09-28-2022, ku do të shpenzohen 90 milionë lekë vetëm për 2 muaj furnizim me naftë. Në dokumente shihet se vetëm “Shpres-Al” ka paraqitur ofertë dhe me pak fjalë Lush Osmani ka konkurruar me veten e tij, e sigurisht në fund është shpallur fitues. Ky prokurim ka risk të lartë për buxhetin e bashkisë si pasojë e korrupsionit gjatë procesit të shpalljes së fituesit.
Për këto shkelje Open Data e ka klasifikuar këtë tender si prokurim me flamur të kuq, për mungesë konkurrence, ndërsa Veliaj pa u shqetësuar ka firmosur kontratën dhe pret që të furnizohen me naftë makinat e punonjësve të Drejtorisë së Përgjithshme të Pastrimit dhe Gjelbërimit Tiranë. Sipas të dhënave, përmes kësaj kontrate do të blihen 48. 000 litra naftë dhe 7 000 litra benzinë.
Shpresa, 36 tendera nga Veliaj
Veliaj e ka klient besnik biznesmenin e mësipërm. Në tenderin e zhvilluar në shkurt 2022 me vlerë 1 miliardë lekë, “Shpresa” gjithashtu ka furnizuar me naftë makinat e Drejtorisë së Përgjithshme të Pastrimit dhe Gjelbërimit Tiranë.
Fakti se biznesmeni Osmani akuzohet nga prokuroria se ka vjedhur pronat e shumë qytetarëve, kjo gjë për Erion Veliaj nuk përbën aspak problem. Morali nuk hyn tek përvetësimi i dhe abuzimi me paratë e bixhetit të shtetit. Gjatë drejtimit të Bashkisë Tiranë nga Veliaj, kompania e Osmanit ka fituar 36 tendera, të cilat kapin e 3.8 miliardë lekësh.
Ndërkaq Lush Osmani abuzon edhe me realizmin e objekteve që fiton në tenderat e Veliajt. Ai është mësuar edhe më parë me manovra të tilla. Jo më larg se korriku i këtij viti, kompania Shpresa-Al ka përfituar në mënyrë të paligjshme 12 milionë lekë, duke mashtruar me volumin e punimeve gjatë zbatimit të kontratës për ndërtimin e rrugës Montekarlo, Rruga Kosova dhe zgjatimin e Rrugës Monarkia Shqiptare në Kamëz. Fillimisht, Osmani ka marrë tenderin në mënyrë të paracaktuar dhe korruptive nga Xhelal Mizu në 2018, me vlerë rreth 800 mijë USD. Më pas, nuk ka zbatuar kontratën për parametrat e ndërtimit të bordurave, duke futur një pjesë të parave në xhep. Duket e çuditshme se si ky biznesmen vijon të mos goditet nga SPAK edhe pse pothuajse abuzon me çdo tender që merr me pazar në tavolinë.
Biznesmeni vazhdon të marrë tenderë të fryrë edhe pasi u shpall në kërkim policor dhe u arrestua për skandalin e pronave në Kepin e Rodonit. Kujtojmë se, në 25 tetor të 2019, Policia e Durrësit shpalli në kërkim me urdhër të prokurorisë pronarin e kompanisë ‘Shpresa.al”, Lush Osmani, i dyshuar si organizator dhe përfitues si skemës së tjetërsimit të 68 mijë metrave katror tokë shtetërore pranë Kepit të Rodonit.
Osmani u shpall në kërkim policor si i dyshuar edhe për përfitimin e një godine në mënyrë korruptive si pjesë e një grupi të strukturuar kriminal. Disa javë më pas, Osmani u vetëdorëzua në Policinë e Durrësit. Fillimisht prokuroria kërkoi izolimin e tij, por më pas, kërkoi masën “Detyrim paraqitje”. Kundrejt garancisë pasurore, Gjykata e Durrësit i ka dhënë masën e sigurisë “Detyrim paraqitje”.
Osmani dyshohej si i implikuar në kthimin e një toke nga tokë bujqësore në tokë truall, përmes falsifikimit të dokumenteve, ku janë përfshirë edhe disa zyrtarë të shtetit. Pas një viti hetime, policia me urdhër të prokurorisë arrestoi 18 persona për skandalin e tokave, mes të cilëve edhe Ardian Iljazaj, ish-drejtor i Hipotekës së Durrësit, si dhe Sulejman Ibrahimi, ish-kryetar i Komunës Ishëm. Kokat e kësaj skeme u liruan më pas nga burgu, duke marrë masën detyrim paraqitje. Por, siç ndodh gjithmonë miqtë e Veliajt i shpëtojnë edhe drejtësisë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post