Opozita kërkon shkarkimin nga detyra e kryebashkiakut të Tiranës të Erion Veliajt, i arrestuar për korrupsion dhe pastrim parash.
Ishte drejtuesi i Departamentit të Shëndetësisë në PD, Ilir Alimehmeti, i cili hapi konferencën për media nga këshilltarët bashkiakë të opozitës. Këta të fundit kërkuan mocion me debat për shkarkimin e Veliajt, i cili prej datës 10 shkurt ndodhet në burgun e Durrësit.
Gjatë fjalës së tij, Ilir Alimeheti tha se është fakt që Veliaj ndodhet në paraburgimin e Durrësit vetëm për një pjesë të dëmeve që i ka shkaktuar qytetarëve të Tiranës dhe opozita kërkon shkarkimin nga detyra.
“Jemi sot në një situatë ku bashkia e Tiranës e ka kryebashkiakun në burgun e Durrësit prej datës 10 shkurt dhe Këshilli Bashkiak ka sot një mbledhje rutinë, jo me ugjencën e nevojitur të rastit, ku ne kemi bërë kërkesat tona të qarta për ndryshimet e rendit të ditës në pikat e mëposhtme. E dimë shumë mirë dhe është fakt që Veliaj ndodhet në paraburgimin e Durrësit vetëm për një pjesë të dëmeve që i ka shkaktuar qytetarëve të Tiranës dhe ne kemi kërkuar shkarkimin nga detyra të tij. Duke marrë parasysh të gjitha skandaleet hetimet dhe abuzimet me miliona euro të bashkisë Tiranë, kujtoj këtu rastin e inceneratorit inekzistent, apo përfitimin e fondeve të bashkisë përmes skemës 5D si dhe tjetërsimin e fondeve të bashkisë për përfitim personal”, tha Alimehmeti.
Ai foli edhe për rolin e kreut të qeverisë Edi Rama në kontrollin ndaj Bashkisë së Tiranës pas arrestimit të Veliajt.
“Është gjithashtu fakt se Rama pas lotëve të krokodilit uzurpoi bashkinë e Tiranës dhe ky është një veprim antikushtetues që kryeministri kryen me vendim të tij. Kryeministri nuk ka asnjë tagër që të shkojë e të lajmërojë kryetarin në detyrë, funksion ky që i takon këshillit Bashkiak dhe këtë uzurpim ai e bën sepse është i shqetësuar për veten dhe mandatin e tij si dhe për marrëdhënien që do ketë ai me drejtësinë. Kërkojmë që Rama të zbatojë ligjin, të shkarkojë menjëherë Veliajn duke ju hapur rrugë procedurave ligjore dhe jo ta qajë atë natën, e t’i marrë vendin ditën”, shtoi ai.
Nënkryetari i Këshillit Bashkiak Dorian Teliti, gjatë fjalës së në konferencën e organizuar në selinë e PD-së nga këshilltarët të opozitës, deklaroi se arrestimi i Erion Veliajt është i vonuar.
“Çdo ditë që ai ka qenë në krye të punëve, janë vjedhur e shpërdoruar miliona euro, përveç kërkesën për mocion sot, Këshilli Bashkiak duhet të bëjë dhe diçka tjetër, të ngrejë Komisionin e Brendshëm të kontrollit financiar që është detyrim ligjor dhe i rregullores së vetë Këshillit Bashkiak”, u shpreh Teliti.
Deri më tani, kreu i qeverisë Rama nuk ka dhënë sinjale se do ta shkarkojë Veliajn nga posti i kryebashkiakut.
Discussion about this post