Bashkia e Tiranës nën drejtimin e Erion Veliajt ka dhënë një tjetër tender në shkelje të hapur të rregullave duke skualifikuar nga gara të gjithë ofertuesit dhe duke shpallur fitues kompaninë “NOVATECH STUDIO”, e cila ka paraqitur ofertën me shifrën më të lartë. Bëhet fjalë për një tender me fond limit rreth 12 milionë lekë të reja.
Objekti i kontratës është mbikëqyrja e punimeve për rehabilitimin e portave të ujëlëshuesit dhe shkarkuesit katastrofik anësor të një rezervuari në Tiranë. Pra gjithë këto para jepen për një kanal shkarkues uji dhe portën metalike.
Ndërsa kohëzgjatja e kontratës mes subjektit fitues të tenderit dhe Bashkisë Tiranë është parashikuar të zgjasë vetëm 45 ditë.
Në dokumentin e publikuar në Open Data argumentimi për skualifikimin e pesë operatorëve të tjerë që kanë paraqitur ofertën e tyre për këtë tender është i njëjtë. Në përshkrim thuhet se oferta e paraqitur rezulton nën vlerën minimale të lejuar për kategorinë dhe grupin ku bën pjesë objekti, duke lënë kështu të hapur rrugën për të fituar tenderin kompania “Novatech Studio”. Open Data e ka kategorizuar si një tender me “red flag” për shkak të rrezikut të lartë që autoriteti të ketë abuzuar në përcaktimin e fituesit.
“Rastësisht” kompania fituese Novatech Studio, rezulton fituese e 39 tenderëve në Bashkinë e Tiranës. Një ndër këto tenderë që kompania në fjalë rezulton fituese e tenderit për rehabilitimin e sheshit përpara degës së Thesarit Tiranë, në rrugën “Mustafa Lleshi”, me ofertën e paraqitur që arrin shifrën rreth 14 milionë lekë, teksa kohëzgjatja e punimeve për rregullimin e sheshit të Thesarit është parashikuar të zgjasë pesë muaj.
Discussion about this post