Ish-Kryeministri Sali Berisha ishte i ftuar mbrëmjen e sotme në emisionin “Çim Peka Live”, ku është shprehur se po i jepet fund kryetarokracisë në Partinë Demokratike dhe emrat po propozohen nga baza ose kanë shprehur dëshirën për të garuar dhe askush nuk ka marrë një vendim nëse duhet të kandidojnë ose jo.
“Po ndodh diçka që kurrë s´ka ndodhur më parë me partitë politike në vend, asnjë kandidat nuk po pengohet të garojë, nëse ai plotëson kushtet.”
Gjithashtu, ish-Kryeministri është shprehur se për herë të parë Kryesia qendrore nuk po seleksionon kandidatët dhe kjo është diçka që s´ka ndodhur asnjëherë.
“Në Prrenjas fitoi Arjan Karriqi, që e uroj përzemërsisht dhe ai nuk ishte pjesë e Foltores. Në Kamëz fitoi Arjan Hoxha, i cili ishte pjesë e Kuvendit të thirrur nga Lulzim Basha me 18 dhjetor. Dasho Aliko nuk kandidoi në Gjirokastër, e kam mik timin, dhe në garë nuk hyri, pra nuk ka një frymë siç mundohen ta paraqesin. Pjesë e procesit është Isa Sakja, njeri me kontribute në PD, pra janë procese që po i bashkojnë demokratët.”
Ish-Kryeministri deklaroi se baza e Partisë Demokratike po shkon drejt bashkimit të vërtetë.
“Primaret në PD do ti përshtasim në variantin më të mirë, duke marrë edhe një kompani që do të na asistojë. Nuk them se këto zgjedhje nuk kanë pasur probleme, por i dhamë fund modelit të kryetarokracisë. Gjithsesi mund të them se vota nuk mori rëndësinë e duhur për shkak të listave, duke mos pasur mundësinë për gjithëpërfshirjen e anëtarësisë.”
Nga ana tjetër, ish-kryeministri Sali Berisha u është përgjigjur deputetëve që kërkuan anulimin e Kuvendit të paralajmëruar nga Rithemelimi.
Berisha tha se grupi parlamentar nuk mund të marrë në dorë partinë. Ai tha se janë të tjera struktura që merre me anën ekzekutive të partisë, pavarësisht se deputetët janë me mjaft rëndësi në një parti, qoftë ajo edhe Partisë Demokratike. Anulimi i Kuvendit sipas Berishës, i shërben vetëm kryeministrit Edi Rama.
“Ne ripërsërisim çdo proces. Ky proces ka nisur në dhjetor, asnjë kompetent nuk e anulon një proces statutor, shko bëje po deshe. Një proces jostatutor e anulon. Alternativa jonë ishte të krijonin auditin, të verifikojmë kudo që janë shkelur dhe të anulojmë çdo proces zgjedhor që nuk është ndjekur statuti dhe të vijojmë përpara. E them me sinqeritet absolut. Nuk mund të anulosh një proces të thyer mbi statutin, nuk mund të ndodhë ajo. Do të ishte pasnesër konferenca, u shty. Shtyrja nuk është antistatuore. Anulimi, po. Disa deputetë kërkuan anulim dhe kjo gjë nuk mund të bëhej. Deputetët janë institucion themelor i një partie, por në të gjitha partitë politike të kontinentit, përveç Britanisë së Madhe, nuk janë ekzekutivi i partisë, janë krahu legjislativ. Nuk mund të marrin funksione ekzekutive.”
Discussion about this post