Njeriu i akuzuar për sulm në një tren metroje në qytetin e Nju Jorkut, Frank James do të mbahet në burg pa mundësi lirimi me kusht, derisa të gjykohet për akuzat federale për terrorizëm.
James, 62-vjeç, ka dalë të enjten para gjykatës, nën dyshimet se ka shkelur ligjin që ndalon “sulmet terroriste dhe dhunë të llojit tjetër” kundër sistemeve të transitit masiv.
Ai është kapur nga forcat e sigurisë pas sulmit që ka lënë të plagosur 23 persona. Avokati i tij ka kërkuar analizë psikiatrike dhe nëse dënohet, ai mund të kalojë pjesën tjetër të jetës i burgosur.
I pandehuri “ka kryer sulm të paramenduar ndaj qytetarëve të Nju Jorkut gjatë orëve të para të mëngjesit”, ka thënë Prokurori amerikan, Breon Pearce teksa ka lexuar deklaratën për akuzat. James akuzohet se ka shtënë me armë zjarri ndaj 10 personave dhe ka plagosur të paktën 13 të tjerë.
I dyshuari ka ikur nga skena e sulmit, mirëpo aty kanë mbetur disa gjëra personale të tij. Raportohet se ka telefonuar vetë policinë për të treguar vendndodhjen, kanë thënë mediat amerikane, duke cituar burimet e tyre.
Në të kaluarën, i dyshuari është arrestuar nëntë herë në Nju Jork dhe tri herë në Nju Xhersi. Motivet e sulmit ngelen mister.
Discussion about this post