677 qirinj janë ndezur për të gjithë minatorët që humbën jetën në minierat e Bulqizës. Miniera e Bulqizës, e filloi aktivitetin më 18 shkurt të vitit 1948. Prej asaj kohe e deri më sot, numërohen afro 677 persona që kanë humbur jetën teksa punonin në galeritë e Bulqizës dhe zonave mineralmbajtëse përreth.
Puna në minierë vazhdon edhe sot e kësaj dite të jetë shumë e rrezikshme. Vetëm në harkun kohor të këtij viti, kanë humbur jetën tre minatorë dhe shumë të tjerë janë plagosur, kujtojmë se i fundit ishte minatori Muharrem Plaku, i cili mbeti i bllokuar pasi galeria ku ai punonte u shemb me 15 shtator. Forcat e kërkimit mundën të gjenin trupin e tij të vdekur vetëm pas 5 ditësh kërkim, por minatori kishte humbur jetën nga mungesa e oksigjenit.
Edhe në formë proteste, por edhe për të kujtuar të gjithë minatorët që kanë lënë jetën në ato galeri, për paga shumë të ulëta, disa të rinj simbolikisht, ditën e premte në mbrëmje, në afërsi të minierave të Bulqizës u ndezën 677 qirinj, në përkujtim të atyre që lanë jetën duke punuar në këto galeri.
Ata thanë se bënë këtë veprim për të përcjellë një mesazh ndaj shtetit dhe kompanive që operojnë në sektorin minerar; për më shumë siguri në punë, për më shumë vëmendje ndaj kësaj kategorie të shoqërisë, për më shumë vëmendje ndaj familjeve që kanë humbur një familjar të tyrin teksa punonte në këto galeri.
/gijotina.com/
