Në lidhje me krimin e rëndë që ndodhi ditën e sotme në fshatin Progër të Devollit, kanë dalë të tjera detaje. Policia ka bërë me dije se autori Ali Zili, 36 vjeç, dyshohet se kishte hyrë në banesë për të grabitur. Ndërkohë ka qenë kryeplaku i fshatit Nevruz Hoxha i cili ka njoftuar policinë për ngjarjen e rëndë, e cila menjëherë ka mbërritur në banesë.
Në një prononcim për mediat, kryeplaku ka bërë me dije se Bukurie Bami, rreth 80 vjeçe, është gjetur e vrarë në korridorin e shtëpisë, ndërkohë Fatmira Bami 60-vjeç është gjetur e shtrirë dhe e gjakosur në dhomën e ndenjes. Ai bën me dije se autori është arrestuar një herë tjetër për dhunë në familje.
“Ngjarja ka ndodhur gjatë natës. Gjatë ditës më kanë marrë në telefon dhe me kanë treguar për ngjarjen. Menjëherë kam njoftuar policinë. Policia ka ardhur në moment. Vjehrra me nusen bashkëjetonin bashkë. Ishin familje e mirë. Nuk i dimë motivet. Ali Zili bënte dru në mal dhe i shiste. Nuk e di nëse i ka shitur dru familjes. Ne kemi vajtur në shtëpi së bashku me policinë. Vjehrra ishte në korridor ndërsa nusja ishte brenda në dhomën ku rrinin. Ishte e gjakosur. Në oborr kishte telefonin dhe një protezë dhëmbësh. Autori është arrestuar një herë tjetër për dhunë në familje”- tha ai.
Fatmira Bami, rreth 60 vjeçe dhe vjehrra e saj Bukurie Bami, rreth 80 vjeçe, janë gjetur të pajeta dhe me shenja dhune rreth orës 15:15, 5 mars në banesën e tyre. Ato kanë mbetur të vdekura si pasojë e goditjeve me sende të forta nga autori Ali Zili, i cili është arrestuar nga policia dhe ka pranuar krimin. Ali Zili sipas policisë, dyshohet se ka hyrë për të vjedhur në banesën e viktimave dhe kur ka hasur në rezistencën e tyre, i ka dhunuar ato me sende të forta duke ju shkaktuar vdekjen.
Ky i fundit ka pranuar krimin, ndërkohë mësohet se ishte me precedentë të mëparshëm penalë, për dhunë dhe për vjedhje.
Discussion about this post