Kardiokirurgu i njohur Edvin Prifti, i akuzuar dhe në hetim nga SPAK për korrupsion, ka reaguar nëpërmjet një statusi në Facebook duke treguar çmimin dhe vlerësimin nga SHBA.
Në këtë postim Prifti shprehet se ky është një satisfaksion amerikan ndaj tij dhe Shqipërisë, pasi ky është një ndër çmimet më të mëdha botërore përsa i përket kirurgjisë kardio torkale.
Gjithashtu, ai nuk lë pa përmendur sesi një çmim i tillë, që është fituar vetëm dy herë në USA, nuk u urua nga vendi i tij.
“Përgjigje! Sadisfaksion amerikan ndaj meje dhe vendit tim. Çmimi më i madh botëror i kirurgjisë kardio torakale ku nga gjithë Evropa Lindore dhe Azia e Afërt si dhe gadishulli arabik pas Hungarisë dhe Izraelit, renditet Shqipëria. Çmim që në 70 vjet, jepet një herë në vit dhe USA e ka fituar vetëm dy herë. Në vendin tim s’ma uroi askush përkundrazi!”, shkruan mjeku kardiolog Edvin Prifti.
Gjykata e Lartë la dje në fuqi vendimin për detyrim paraqitje për mjekun, duke rrëzuar kërkesën e SPAK për rikthimin e tij në qeli.
Mjeku Prifti mori ryshfet nga kryesekretarja e Gjykatës së Krujës, Manuela Mallakuçi për t’i operuar nënën. Sekretarja e Gjykatës së Krujës Manuela Mallakuçi ka qenë nën përgjim pasi ishte përfshirë në lirimin e të dënuarit Saimir Petani, i cili priste të lirohej nga Enkelejda Hoxha por që nuk u lejua nga SPAK duke e arrestuar atë dhe gjyqtaren Hoxha gjatë seancës.
