Një aksident i rëndë automobilistik u shënua dje në fshatin Bogë të Malësisë së Madhe. Për pasojë humbi jetën Pjetër Rushaj, së bashku me djalin e tij të mitur. Shkak për ngjarjen fatale u bë përroi, i cili mori me vete makinën me të cilën udhëtonin babë e bir.
Rushaj ishte një biznesmen i njohur për ndërtimet karakteristike të zonës alpine në Malësinë e Madhe dhe Dukagjin. Ai ishte duke udhëtuar së bashku me djalin 14-vjeçar dhe vajzën e mitur. Kjo e fundit fatmirësisht arriti të shpëtonte pasi doli në kohë nga makina.
Situata e reshjeve e ka shtyrë 50-vjeçarin, i cili kishte lënë Anglinë për të investuar në Shqipëri, të shkonte në fshatin Bogë ku kishte ndërtuar dy shtëpi së bashku me të vëllanë, të shikonte nëse kishte dëmtime në banesa.
Ai kishte marrë me vete edhe dy fëmijët e tij.
Në zonën e njohur si “Grykë Lugje” ishte tentuar të kalonte lumin, pasi në atë vend nuk ka urë, por qytetarët kalojnë përmes lumit.
Ujërat e rrëmbyer të lumit nuk e kanë lejuar të vazhdojë duke i ndaluar makinën Benz.
Ai së bashku me djalin dhe vajzën kanë dalë nga mjeti, ndërsa vajzës i kishte thënë të shkonte në fshatin më të afërt të merrte kavo për të nxjerrë makinën.
Një valë e fuqishme e “Përroit të Thatë” ka rrëmbyer djalin e tij 14-vjeç, ndërsa Pjetër Rushaj është hedhur që ta shpëtojë të birin.
Asnjëri prej tyre nuk arrit që të dilte nga uji.
Gjetja e trupave është bërë e mundur ditën e sotme pas 16 orësh kërkime, rreth 300 metra më poshtë makinës.
14-vjeçari J.Rushaj ka qenë pjesë e ekipit të Akademisë së Futbollit” Djelmnia Shkodrane.”
Discussion about this post