Policia e Fierit ka bërë publike detajet e ngjarjes së rëndë të ndodhur dje në Fier, ku 8-vjeçari u vra mizorisht nga fqinji i tij.
Sipas policisë, nga hetimet e kryera dyshohet se, Klodian Çalamani e ka goditur me send të fortë (kazmë) në kokë, fëmijën e mitur dhe më pas e ka groposur atë në oborrin e banesës së tij.
Nga këqyrja e vendit të ngjarjes janë gjetur dhe sekuestruar në cilësinë e provës materiale: një lopatë, një kazmë, një biçikletë, rroba të autorit dhe njolla gjaku, të cilat u dërguan për ekzaminime të mëtejshme në Institutin e Policisë Shkencore Tiranë.
Policia tregon se është njoftuar për humbjen e të miturit nga e ëma e tij, e cila i ka telefonuar rreth orës 14:40, duke iu thënë se djali i saj i mitur i vitlindjes 2013, kishte dalë që në orën 08:00 nga shtëpia dhe nuk ishte kthyer më në banesë. Më pas, rreth orës 15:30, e ëma është paraqitur për të bërë kallëzim për humbjen e djalit të saj.
Pas kësaj telefonate policia e Fierit është organizuar në terren për kërkimin e të miturit dhe si rezultat kanë bërë të mundur gjetjen e vendit të dyshuar ku mund të ndodhej fëmija i humbur.
Policia tregon se trupin e pajetë e gjetën teksa kontrollonin në ambientet e banesës së autorit të krimit, Klodian Çalamani, i cili kishte mbuluar viktimën me baltë në oborrin e shtëpisë.
Pas gjetjes së trupit, policia ka shoqëruar autorin në komisariat dhe nën drejtimin e Prokurorisë janë veprimet procedurale për zbardhjen e rrethanave të ngjarjes dhe motiveve të saj.
Klodian Çalamani, 38 vjeç, do të përballet me drejtësisnë për veprën penale “Vrasja në rrethana cilësuese, ndaj të miturit”. Materialet i janë kaluar Prokurorisë pranë Gjykatës së Shkallës së Parë Fier.
Nga ana e grupit hetimor, nën drejtimin e Prokurorisë, po punohet për të sqaruar me detaje motivet e kësaj ngjarjeje.
Discussion about this post