Kompozitori Limos Dizdari proteston prej 12 ditësh përpara Kryeministrisë me shpresën se do shpëtojë Shtëpinë e Kulturës “Dea”. 22 vite më parë, Dizdari mori Pallatin e Kulturës në Ksamil në gjendje skandaloze dhe e ktheu në një qendër arti. Ai tashmë është në “luftë”, pasi objektin në fjalë duan t’ia marrin.
Kompozitori akuzon kryeministrin Edi Rama, pasi sipas tij asgjë nuk ndodh pa urdhrin e tij. 42 letra i janë dërguar Ramës dhe vartësve të tij, por deri më tani nuk është dhënë asnjë zgjidhje. Në vitin 2020 mbaronte kontrata me qendrën e artit “Dea”, e Dizdari kishte të drejtë ta parablinte, por përkundrazi e drejta i kaloi konfederatës.
“Priste që të vite 31 dhjetori dhe u fut Konfederata dhe e shet dhe ajo që kam bërë unë, kam kushtuar 600 e ca mln lekë, rikonstruksioni, e ndërsa konfederata e ka shitur për 200 e ca mln lekë”, tha Dizdari.
Ndër të tjera ia pohon se nuk ka gjetur zgjidhje as nga Bashkia Sarandë, teksa i është drejtuar dhe SPAK-ut. Dizdari pohon se Kolë Nikolla, ia ka shitur godinën nipit të Zabit Brokës.
Limos Dizdari është shprehur se nuk e ka humbur shpresën e në fund do të gjejë një zgjidhje. Ai do të vijojë të protestojë deri sa e gjithë kjo të marrë fund.
