Refik Mata, u gjet i pajetë më 17 dhjetor 2021, brenda qelisë së burgut të Tarascon në Francë. Gjykata në Francë ka mbyllur çështjen me vendimin se i riu ka vrarë veten, por familjarët hedhin dyshime dhe nuk e pranojnë këtë variant. Në lidhje më ketë çështje ka folur sot vëllai i viktimës Bekim Mata, i cili thotë se institucionet franceze nuk i kanë dhënë asnjë dokument që vërteton shkaqet e vdekjes. Ndërsa më tutje ka treguar bisedën e fundit që ka pasur me të vëllain.
Sipas Bekimit, vëllai i tij nuk kishte shfaqur asnjë shqetësim si dhe nuk kishte asnjë arsye për t’u vetëvrarë. Ai ka një apel të fortë për shtetin shqiptar dhe autoritete përkatës. Ai kërkon të paktën një shpjegim zyrtarë nga autoritet franceze për të mësuar shkaqet e vërteta të vdekjes së 29-vjeçarit. Ai tha se vëllai ishte i qetë dhe në telefonatën e fundit i ishte treguar se ka filluar punë në burg dhe po përshtatet.
“Kam bërë denoncim në autoritet shqiptare dhe nuk kam asnjë përgjigje deri më tani. Si nga avokati i popullit, si nga ministria e jashtme dhe si nga Prokuroria e Përgjithshme. I bëj apel shtetit shqiptar nga ana juridike të ndërhyjë për të marrë vesh të paktën si ndodhi. E di që vëllain tim nuk ma ngjallin dot, po të paktën një letër me shkrim, si, tek, qysh, si ndodhi. Këtë kërkoj nga autoritet shqiptare dhe franceze.” thekson Bekim Mata në një intervistë televizive.
Më parë edhe prindërit e viktimës janë shprehur se nuk pranojë versionin e vetëvrasjeje, prandaj kërkojnë drejtësi për djalin e tyre.
Discussion about this post