Dosja “AKSHI”/ Arrestohet në Francë Ermal Beqiraj, SPAK e kërkonte me masë “arrest me burg”

Ermal Beqiraj, person i shpallur në kërkim nga Prokuroria e Posaçme (SPAK) në lidhje me dosjen “AKSHI”, është arrestuar në Francë.

Lajmi është bërë i ditur këtë të martë, ndërsa ndaj Beqirajt ishte lëshuar më herët masa e sigurisë “arrest me burg” nga Prokuroria e Posaçme.

Arrestimi i tij pritet të pasohet nga procedurat për ekstradim drejt Shqipërisë, në mënyrë që autoritetet shqiptare të vijojnë veprimet hetimore dhe procedurale në kuadër të dosjes së hapur për Agjencinë Kombëtare të Shoqërisë së Informacionit (AKSHI).

Çështja “AKSHI” është një nga dosjet që po hetohet nga SPAK, ku janë ngritur dyshime për shkelje të mundshme gjatë procedurave dhe kontratave të lidhura me institucionin.

Beqiraj ishte shpallur në kërkim pas vendimit të marrë nga organi i akuzës, ndërsa arrestimi në Francë shënon hapin e radhës në këtë proces hetimor.

Beqiraj është pronar i kompanisë “Soft & Solution” dhe akuzohet se ka përfituar tenderë me vlerë mbi 1.1 milion euro.

Sipas SPAK, këto përfitime janë siguruar pas kërcënimeve që krahu i djathtë i Ergys Agasit dyshohet se i ka bërë një kompanie konkurruese të përfshirë në një nga procedurat e prokurimit.