Episod i pabesueshëm në Sivas të Turqisë, i ndodhur dje në ndeshjen Sivasspor-Fiorentina, kur pak pas golit të 4-të të shënuar nga Castrovilli dhe gjatë ngazëllimit të lojtarëve, një tifoz turk hyri në fushë dhe goditi mesfushorin e ri Alessandro Bianco në fytyrë.
Ai ishte aktivizuar pak minuta më parë duke zënë vendin e Amrabat.
Një goditje e fortë që shkaktoi thyerjen e kockës së hundës por që nuk do të mbetet pa pasoja pasi sipas mediave turke raportohet mëngjesin e sotëm agresori është arrestuar menjëherë dhe sot do të gjykohet në Turqi për agresion.
Në lidhje me episodin ka folur edhe trajneri i Fiorentinës, Vincenzo Italiano.
“Grushti i dhënë ndaj Biancos është i turpshëm, as që e priste. I është thyer hunda. U duk një festë, edhe me një stadium kaq të mbushur tifozët mbështetën lojtarët e tyre por ky gjest prishi gjithçka, pavarësisht fitores tonë”.
Pas sulmit të pësuar nga Bianco, drejtori i përgjithshëm i Fiorentinës, Joe Barone, thirri presidentin e UEFA-s, Aleksander Ceferin, për të kërkuar qartësi. Më vonë bëri të njëjtën gjë edhe me ECA (Asociacioni i Klubeve Evropiane). Bianco ka pësuar një thyerje të hundës dhe lëndime të tjera në fytyrë dhe sipas asaj që mësohet ka denoncuar agresorin.
Discussion about this post