Ditën e sotme Gjykata e Tiranës pritet të japë masën e sigurisë për katër pjesëtarët e rrjetit ndërkombëtar që mashtronte bizneset online, duke shkaktuar një dëm prej gati 4 milionë eurosh. Mësohet se prokuroria ka kërkuar arrestim për të pandehurit, ndërsa i është bërë kërkesë Interpolit për kapjen e dy shtetasve nga Kameruni.
Dy shtetas nga Kameruni dhe shqiptarët e arrestuar nëpërmjet skemës “Mashtrimi i pagesës nëpërmjet postës elektronike” së bashku me të tjerë jashtë Shqipërisë kanë kontrolluar komunikimet e postës elektronike midis klientëve dhe subjekteve tregtare, duke zhvatur shuma të konsiderueshme parash.
Janë arrestuar:
Donald Anu, 34 vjeç, shtetas i Kamerunit, alias Ugochukëu
Marie Goufan, 31 vjeçe, shtetase Kamerunase, banuese në Tiranë
Fatbardh Danja, 40 vjeç, banues në Tiranë;
Xhentil Kupe, 54 vjeç, banues në Tiranë.
Si funksiononte mashtrimi?
Të arrestuarit, së bashku me shtetas të tjerë jashtë territorit të Republikës së Shqipërisë, kanë kontrolluar komunikimet e postës elektronike midis klientëve dhe subjekteve tregtare. Pasi kanë ndërhyrë në sistemin kompjuterik ata kanë qëndruar të “fjetur” derisa kanë parë kërkesa specifike në lidhje me fonde ose pagesa të ndryshme. Në këtë moment, këta shtetas kanë bërë lëvizjet e tyre. Ata kanë kontaktuar klientin, duke marrë rolin e subjektit pritës të fondeve, duke i informuar ata se detajet bankare të kompanisë kanë ndryshuar dhe duke kërkuar që ata të transferojnë fondet në llogarinë e re. Ata duke qenë në brendësi të komunikimeve kanë qenë në gjendje të prodhojnë një mesazh të postës elektronike me pamje me pamje të njëjtë me të vërtetin.
