Pas Flamur Nokës, Edi Palokës, e Tritan Shehut, edhe ish-deputeti Klevis Balliu i ka dalë në krah ish-kryeministrit Sali Berisha, në përballjen me Bashën.
Balliu shkrun në Facebook, se vendimi për përjashtimin e Berishës nga grupi parlamentar nuk i kushton vetëm PD, por edhe opozitarizmi në Shqipëri.
“Përjashtimi i Sali Berishës, Përjashtim i simbolit të opozitarizmit
Vendimi për përjashtimin e Sali Berishës është një vendim i gabuar që nuk i kushton vetëm Partisë Demokratike por i kushton shumë opozitarizmit në Shqipëri. Nuk merren vendime të momentit për politikanë të gjithë kohëshëm. Ai ka qenë, është dhe do të mbetet zëri më i fuqishëm opozitar me denoncimet e tij që nga avionët e drogës e deri tek kapja e shtetit”.
Ndër të tjera, ai shkruan se përballja duhet të jetë me kryeministrin Rama, që sipas tij ka shkatërruar demokracinë dhe vjedhur shqiptarët.
“I gjithë lidershipi i Partisë Demokratike ishte kokëulur në selinë e PD përballë simpatizantëve demokratë. Asnjë fitore e PD nuk mund të quhet e tillë nëse ajo vjen duke shkelur të drejtat e demokratëve e aq më tepër të liderit historik të saj. Armiku dhe përballja është dhe duhet të jetë me Edvin Kristaq Ramën, njeriu i cili ka vjedhur shtetin, ka shkatërruar demokracinë, ka vjedhur shqiptarët dhe ka tradhtuar Shqipërinë duke cënuar interesat tona kombëtare”, shkruan Balliu.
Kujtojmë se, krisja e marrëdhënieve mes Bashës dhe Balliut, lindi që në zgjedhjet e 25 prillit, ku ndonëse drejtoi protestat e Astirit, një nga kauzat e mbrojtura nga Partia Demokratike, ai nuk ka mundur të fitojë besimin e demokratëve, duke u përjashtuar nga lista si kandidat për deputet në zgjedhjet e 25 prillit.
