Në fjalën e tij, Kryeministri Edi Rama ka kritikuar ashpër strukturat organizative të Partisë Socialiste. Ai tha se për shkak të justifikimeve, në PS nuk janë afruar figura të reja.
“Rezultatet jo në lartësinë e duhur janë justifikuar njësoj, duke thënë jo po nuk është kollaj të gjesh njerëz të rinj, jo po të mos prishim ekuilibrat se janë zgjedhjet, jo po na mërziten ata poshtë dhe nuk afrohen për zgjedhje, jo po nuk afrohen njerëzit po nuk u dhe punë shteti, jo po rinia është indiferente, jo po statuti, jo po udhëzimi jo po duam mbështetje nga lart, jo po ç’deshi ai te zona ime, jo po se desha atë të vinte te lagjja ime, jo po ajo pi kafe te lokali i PD, jo po ajo ja ka lënë lokalin LSI. Një parti politike dhe gjykimi i saj nga publiku dhe kthimi në një komunitet vlerash është si të pajtohesh me vetëkyçjen brenda një rrethi vicioz”, tha Rama.
Ai tha se duhet të zhdukim atë grup që kapardiset në lokale, për të treguar se kjo nuk është PS.
“Nëse duam një parti të rifitojë përsëri besimin e shqiptarëve, shëmbëlltyre e asaj parie kapardisur nëpër rrugë e nëpër kafene, duhet zhdukur nga sytë e popullit. Nëse duam që shqiptarët të na afrohen shumë më shumë dhe nëse duam që Shqipëria e kësaj periudhe të historisë që ne kemi fatin ta shkruajmë pas 2 zgjedhjesh të jetë ngjitur në majë”, tha ai.
Teksa u ndal në afrimin e të rinjve te politika Rama tha se në sytë e tyre politika shqiptare duket si një “klub çakenjsh”.
“Në sytë e publikut, të rinjve iu duket si “klub çakejsh”. Partia nuk mund të zgjohet kur vijnë zgjedhjet dhe nuk mbahet gjallë si moçal interesash në rrethet e të privilegjuarve dhe e vërteta e hidhur se pavarësisht dallimeve me rivalët tanë, pasqyra e partive tona, në sytë e komuniteteve të Shqipërisë ngjan si një copë e filmit ‘Koncert në vitin 1936’, ku kemi një tufë me drejtorë”, tha Rama.
