Zlatan Ibrahimovic ka zbuluar shumë të pathëna në lidhje me klubet ku ka luajtur në autobiografinë e tij me titull ‘Adrenalinë’
Koha te Machester United është një nga ato që 40-vjeçari, i cili luan me Milanin në Serinë A, kujton me më pak dëshirë.
Ai ka zbuluar një skandal që nuk ishte dëgjuar më parë për një klub futbollit, sulmuesi suedez ka theksuar se atij i është mbajtur 1 euro nga rroga vetëm sepse kishte marrë një lëng frutash në minibar.
“Isha në hotel me skuadrën dhe kisha etje, kështu që shkova te minibari dhe mora një lëng frutash. Kaluan disa ditë dhe erdhi koha për të marrë pagën. Zakonisht nuk e shoh sa më kanë kaluar në llogari, e shoh vetëm në fund të vitit. Mirëpo, në këtë rast e pashë dhe vura re se nga rroga më mungonte 1 euro”,-tha ai.
Më tej ka treguar edhe mënyrën sesi e zbuloi një skandal të tillë, duke theksuar se këto detaje bëjnë diferencën mes klubeve.
“Telefonova menaxherin e skuadrës dhe i thashë pse më kanë hedhur një euro më pak. Më tha se 1 euro ishte zbritur për shkak të lëngut të frutave që kisha marrë në hotel. Mendova se po bënte shaka, por më tha se te United çdo gjë paguhej. U irritova sepse unë nuk shkova në hotel për pushime, por po përfaqësoja United. Isha prej punës në atë hotel. Nëse puna ime është të luaj futboll, duhet të pi lëngje. Nuk luaj dot i dehidratuar. Nuk më besohej që më mbajtën 1 euro, diçka e tillë nuk do të kishte ndodhur kurrë në Itali. Këto janë detaje që bëjnë diferencën mes klubeve”,-shtoi Ibra.
Ai ka theksuar e edhe një problem tjetër nga periudha kur luante për United, rojën e qendrës stërvitore.
“Çdo ditë, kur shkoja në qendrën stërvitore të klubit, duhej të tregoja dokumentet në mënyrë që të hyja. Një ditë, ula xhamin e makinës dhe i thashë personit te dera se unë isha lojtari kryesor i skuadrës dhe nëse nuk më njihte, atëherë duhet të ndërronte profesion”,-theksoi Zlatan Ibrahimovic./Sportzona.al
Discussion about this post