Ministrja e Ekonomisë dhe Financave, Delina Ibrahimaj është thirrur në seancë dëgjimore në Komisionin e Ligjeve, ku po shqyrtohet projektligji për buxhetin e vitit 2022.
Ibrahimaj është pyetur nga deputeti Fatmir Mediu për dëmshpërblimin e ish të përndjekurve politikë dhe pensionet e ushtarakëve.
“Ka pasur gjithmonë fond tre miliardë për pronarët. Sa është disbursuar dhe sa pritet të disbursohet. Për sa kohë mund të mbyllet ky disbursim i pronarëve? Sa do të kompensohen pronarët që kanë fituar këtë të drejtë nga gjykata e Strasburgut? Edhe për të përndjekurit politikë e njëjta pyetje. Jam në mbështetje të ngritjes së buxhetit të mbrojtjes. Pensionet e ushtarakëve të përfshihen në buxhetin e mbrojtjes, por këto janë pjesë e politikave sociale, po ashtu spitali ushtarak dhe mbrojtja civile. Sa përqind zënë këto? Përfshirja e spitalit ushtarak më bën përshtypje. S’ka më spital ushtarak. Me sa di i ka kaluar kaluar ministrisë së Shëndetësisë. I shërben më shumë civilëve sesa ushtarakëve”, tha Mediu.
Nga ana tjetër, ministrja tha se të përndjekurit politikë janë kompensuar dhe tani po kompensohen familjarët.
“Ka një shtesë në këtë fond për pronarët. Vendimet e Starsburgut, ministria e Fifancave i publikon dhe i merr parasysh edhe në drejtim të risqeve. Por të përndjekurit politikë janë kompensuar, gjithashtu dhe pjesa e mbetur është për familjet e të përndjekurve politikë. Për vitin 2022 fondi i alokuar është 1 miliard lekë. Të gjithë ata ish të përndjekur që janë të gjallë janë të kompensuar dhe pjesa e mbetur mbeten për familjarët. Buxheti ka qenë i ngjeshur nga tërmeti dhe pandemia dhe është dashur të bëhen ndryshime në mbrojtje të buxhetit. Spitali ushtarak ka qenë gjithmonë pjesë e buxhetit të mbrojtjes, emergjencat gjithashtu. Kemi parashikuar fonde për ngritjen e një akademie në mbrojtje”, u shpreh ministrja.
Më herët ministrja ishte thirrur në seancë dëgjimore te Komisioni i Financave, ndërsa më vonë do jetë e pranishme tek Komisioni i Edukimit dhe Mjeteve të Informimit.
Discussion about this post