U godit me thikë në qafë, identifikohet dhe shpallet në kërkim autori i plagosjes së 26-vjeçarit në Korçë

Policia e Korçës ka identifikuar autorin e plagosjes të regjistruar mbrëmjen e djeshme në qytetin juglindor.

Përmes një komunikate, blutë e Korçës bëjnë me dije se bëhet fjalë për shtetasin J. R., 22 vjeç, i cili akuzohet se ka plagosur me thikë 26-vjeçarin Kostandin Ziu.

Ngjarja e rëndë u regjistrua gjatë orëve të mbrëmjes të së enjtes, në një lokal në një nga lagjet periferike të qytetit të Korçës, në lagjen nr.10.

Burime bëjnë me dije se i plagosuri dhe autori i dyshuar kanë qenë bashkë në shoqërinë e një femre. Pas plagosjes, mësohet se kanë qenë këta dy të fundit të cilët dërguan në spital 26-vjeçarin dhe më pas u larguan menjëherë duke braktisur kështu edhe mjetin e tyre tip “Renault Clio”.

Dyshohet se dy të rinjtë janë konfliktuar fizikisht me njëri-tjetrin, sherr që degradoi deri në plagosjes me thikë të 26-vjeçarit Kostandin Ziu.

I riu ka marrë plagë me thikë në qafë dhe kokë dhe pas mjekimit në spitalin e Korçës, bluzat e bardha vendosën ta dërgonin mbrëmjen e djeshme tek spitali i Traumës në Tiranë për mjekim më të specializuar, për shkak të gjendjes së rëndë të tij. Mësohet se aktualisht 26 vjeçari ndodhet në gjendje kome.

Ziu kishte vetëm dy javë që ishte liruar nga burgu i Peqinit, ku kryente dënimin për dhënie të ndihmës për kalim të paligjshëm të kufijve.

Deri më tani nuk ka asnjë gjurmë nga 22-vjeçarit J. R., i cili është shpallur në kërkim dhe blutë e Korçës po ushtrojnë kontrolle për kapjen e tij.

Grupi hetimor nën drejtimin e Prokurorisë po punon për sqarimin e rrethanave dhe dokumentimin ligjor të rastit.