“Identitek”: Anëtarët e bordit vjedhin, kurse punonjësve u mohohen të drejtat

Nuk kanë të ndalur skandalet e drejtoreshave që vijnë e ikin në krye të institucionit Identitek. Kujtojmë që për një vit e gjysmë, Loina Prifti ka drejtuar kompaninë shtetërore të prodhimit të pasaportave biometrike dhe kartave të identitetit, të njohur ndryshe si Identitek.

Por në nëntor të 2024 ajo është shkarkuar nga detyra prej ministrit të Brendshëm, Ervin Hoxha, pas nisjes së auditit në institucionin që ajo drejtonte. Të njëjtat burime raportojnë se Prifti i kishte caktuar vetes një pagë 15 mijë euro në muaj.

Ndërkohë në vend të saj u emërua Freksida Halilaj e cila po ndjek të njëjtat rrugë përfitimi.

Ditët e fundit në kompaninë “Identitek”, një situatë e padrejtë dhe diskriminuese po përbën një shqetësim të madh për punonjësit.

Pavarësisht premtimeve për investime dhe angazhime publike, siç është deklaruar për diasporën, realiteti për ata që punojnë çdo ditë është ndryshe.

Rroga e 13-të, një bonus i zakonshëm dhe i pritur për çdo punonjës, nuk është dhënë për këtë vit, me justifikimin e pabazuar se “nuk është miratuar nga bordi”.

Ndërkohë, anëtarët e bordit vazhdojnë të përfitojnë rroga shtesë çdo 3-4 muaj, pa asnjë justifikim të besueshëm, duke e theksuar më tej pabarazinë në trajtimin e punonjësve.

Kërkesa e punonjësve është e thjeshtë dhe e drejtë: trajtim i barabartë dhe i dinjitetshëm, pa dallime dhe favorizime të padrejta.

Mesazhi denoncues për JOQ:

“Dua të denoncoj publikisht një situatë të padrejtë që po ndodh në kompaninë Identitek. Nuk e di me cfarë pafytyrësie dalin dhe bëjnë fasadë për investime surreale sic dolën duke treguar për “investimin” që po bëjnë për diasporën. Siç u tha dhe përmend tek faqja juaj dhe para disa ditësh për këtë vit, rroga e 13-të – një bonus i zakonshëm dhe i pritshëm – nuk është dhënë, me justifikimin e pabazuar se “nuk është miratuar nga bordi”.

Ne, punonjësit e zakonshëm, jemi ata që kemi punuar pa u ndalur, duke dhënë maksimumin për suksesin e kompanisë. Në këmbim, meritojmë trajtim të drejtë dhe të barabartë, jo diskriminim të hapur dhe mungesë transparence. Ky vendim tregon qartë papërgjegjshmërinë dhe mungesën e drejtësisë nga ana e bordit të kompanisë.

Ndërkohë, anëtarët e bordit vazhdojnë të përfitojnë rroga shtesë çdo 3-4 muaj, pa asnjë pengesë apo justifikim. Kjo situatë është e papranueshme dhe kërkon reagim të menjëhershëm.

Kërkojmë që bordi i Identitek të mbajë përgjegjësi për këtë padrejtësi dhe të sigurojë që:

Praktikat e padrejta dhe diskriminuese të ndalen menjëherë. • Punonjësve t’u sigurohet trajtim i drejtë dhe me dinjitet. • Të drejtat tona të respektohen siç e meritojmë. Ne e meritojmë më shumë!”