Ish-sulmuesi i Kombëtares Shqiptare dhe i shumë klubeve të njohura në Gjermani dhe Itali, Igli Tare i ka dhënë lamtumirën pak javë më parë Lacios, duke mbyllur pas 18 vitesh aventurën te bardhekaltrit.
Dhe kush mendonte se ish-kapiteni i kombëtares shqiptare do kalonte pak kohë larg fushave të lojës duke menduar për projektin e ri, është gabuar.
Tare është kthyer në Shqipëri dhe po ndjek ne interes zhvillimet e futbollit vendas. Jo vetëm kaq, por siç ka raportuar “Panorama Sport”, ai ka pasur takime edhe me pronarin e Çelsit, Tod Bohli në këto ditë në vendin tonë, si dhe është i përfshirë në mënyrë direkte në projektin e ri të klubit Dinamo, që do të bashkëpunojë me Mançester Sitin duke u transformuar në Dinamo City
Tare është shfaqur në stadium me atë që pritet të jetë trajneri i ri i Dinamos, ish-mesfushori i njohur italian Luixhi Di Biaxho, teksa ka parë në veprim blutë në miqësoren ndaj Skënderbeut në Korçë.
Një lajm që ka bërë bujë edhe përtej Adriatikut, me mediat italiane që ishin të interesuara të mësonin rreth të ardhmes së Tares, një drejtues shumë i njohur sportiv tashmë.
Portali “LaLazioSiamoNoi” ka kontaktuar me Taren, rreth këtij informacioni që ka bërë bujë jo vetëm në ambientin futbollistik shqiptar.
“Nuk është asgjë e vërtetë, unë po i gëzohem familjes time”, Ishte përgjigja e drejtuesit sportiv shqiptar, i cili vazhdon të insistojë se këto ditë është me pushime në vendlindje dhe nuk ka të bëjë aspak me ndryshimet radikale që po bën klubi i Dinamos./PanoramaSport
Discussion about this post