Inspektorati Kombëtar për Mbrojtjen e Territorit ka vijuar sot prishjet në qytetin e Librazhdit, si pjesë e zbatimit të projektit me interes publik “Zgjerimi i segmentit rrugor Dalje Elbasan – Përrenjas – Qafë-Thanë, Faza IV”. Në kuadër të këtij projekti, parashikohet shembja e 22 objekteve deri në katër kate, të cilat ndodhen përgjatë aksit që do të zgjerohet.
Aksioni është shoqëruar me tensione mes pronarëve të objekteve dhe forcave të Policisë së Shtetit. Banorët, objektet e të cilëve janë boshatisur që prej 17 nëntorit 2025, pretendojnë se nuk kanë marrë ende kompensimin financiar për prishjen e godinave dhe kërkojnë pezullimin e procesit deri në përmbushjen e detyrimeve nga shteti. Shefja e Policisë, Nertila Meta, u ka bërë thirrje qytetarëve të mos pengojnë punonjësit e IKMT-së, duke paralajmëruar se çdo rezistencë do të sjellë pasoja ligjore.
Nga ana tjetër, pronarët kanë reaguar me indinjatë, duke theksuar se nuk kundërshtojnë projektin, por vetëm mungesën e pagesës. Ata kërkojnë praninë e një përfaqësuesi shtetëror që t’i dëgjojë dhe t’i garantojë për të drejtat e tyre.
“Ne nuk kemi marrë lekët, prandaj kundërshtojmë. Objektin e kemi boshatisur, por kush na mbron ne?”, është shprehur një prej pronarëve, ndërsa kërkojnë pezullim të prishjeve deri në marrjen e kompensimit të plotë.
Discussion about this post