Inspektoriati i Lartë i Drejtësisë mohon që në këtë institucion të jetë depozituar ndonjë ankesë nga Erion Veliaj ndaj prokurorit të çështjes së tij në SPAK, Ols Dado.
Në një përgjigje të shkurtër të dhënë për mediat, ILD bën me dije se deri në përfundimin e orarit zyrtar nuk është administruar nga ky institucion asnjë ankesë e Veliajt.
“Në përgjigje të interesit, deri në përdundim të orarit zyrtar, nuk është administruar ankesë nga z.Veliaj në ILD.” – thuhet në përgjigjen e ILD-së
Në media u raportua se Erion Veliaj i ishte drejtuar me një shkresë Inspektoratit të Lartë të Drejtësisë dhe Këshillit të Lartë të Prokurorisë, ku kërkonte nisjen e një procedimi disiplinor dhe pezullimin nga detyra tё prokurorit Dado. Madje, u publikua edhe shkresa e plotë, por siç duket, Veliaj e ka nisur në media, para se ta depozitoj në institucionet ku duhej dorëzuar.
Veliaj pretendon se Ols Dado ka kryer shkelje në shqyrtimin e çështjes penale ndaj tij dhe se është në kushtet e konfliktit të interesit, për shkak të një leje pallati që ka kërkuar në Bashkinë e Tiranës.
Kujtojmë se Erion Veliaj u arrestua me urdhër të SPAK më 10 Shkurt, ku akuzuohet për korrupsion në 9 raste dhe pastrim parash. Nga hetimi i SPAK ka rezultuar se Erion Veliaj dhe Ajola Xoxa kanë krijuar një skemë përfitimi ryshfetesh për pasurim personal përmes një numri organizatash dhe kompanish të kontrolluara prej tyre apo të afërmve të tyre dhe kanë përfituar së paku 1.1 milionë euro në nëntë raste. Veliaj akuzohet se ka përfituar tre vila në një fshat turistik në Qerret ndërsa Xoxa akuzohet se ka shpenzuar rreth 800 mijë euro në blerje online, të cilat nuk i ka deklaruar në deklaratat vjetore.
Që prej arrestimit, Erion Veliaj ka nisur një sulm me fyerje dhe kërcënime ndaj magjistratëve të çështjes së tij, prokurorit Ols Dado dhe gjyqtarit, Erjon Bani.
Discussion about this post